Qarjy mınıstrligi azamattardyń densaýlyǵyn saqtaý maqsatynda temekini 6,5 paıyzǵa qymbattatpaq. Buıryq Ashyq NQA portalynda jarııalandy, dep jazady Egemen.kz.
Ulttyq statıstıka bıýrosy júrgizgen zertteýge sáıkes, ótken jyly 29 ben 39 jastaǵy azamattardyń arasynda shylym shegetinder kóbeıgen. Sondaı-aq Qazaqstandaǵy árbir besinshi adam temeki tartatyny anyqtaldy.
Qazaqstanda 1 shildeden bastap eń arzan temeki 820 teńgeden satylady, bul qazirgi baǵadan 50 teńgege qymbat.
Sońǵy jarty jylda shylym baǵasy 16 - 18,8 paıyzǵa artqan. Al bıylǵy jyldyń alǵashqy toqsanynda temeki men papırostyń baǵasy 53,4 paıyzǵa artqan. Alaıda elde temekige táýeldi azamattardyń sany azaımaı tur.
Byltyr papırostyń ishki naryqtaǵy kólemi 62 paıyzǵa kóbeıgen. Al bıylǵy jyldyń alǵashqy úsh aıynda el azamattary temekige 5,7 mıllıard teńge qarjy jumsaǵan.