Májiliste «Qazaqstan Respýblıkasynyń keıbir zańnamalyq aktilerine turǵyn úı saıasatyn reformalaý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń zań jobasy ekinshi oqylymda qabyldandy, dep habarlaıdy Egemen.kz.
Parlament Májilisiniń Ekonomıkalyq reforma jáne óńirlik damý komıtetiniń múshesi Ulyqbek Tumashınov turǵyn úı saıasatyn reformalaý máseleleri boıynsha ózgerister men tolyqtyrýlar týraly zań jobasy aıasynda jasaǵan baıandamasynda turǵyn úıdi jekeshelendirý jáne ártúrli sanattaǵy adamdardy baspanamen qamtamasyz etý máselesin kóterdi.
Atalǵan zań jobasy ótken jylǵy qarashada birinshi oqylymda maquldandy.
Zań jobasynda myna máseleler qarastyrylǵan:
Memleket basshysynyń tapsyrmasy boıynsha Otbasy bankin «tolyqqandy damý ınstıtýty» etip, azamattardy esepke qoıý men turǵyn úılerdi bólýdi ortalyqtandyrýǵa baǵyttalǵan normalar kózdelgen.
Jergilikti atqarýshy organdardan turǵyn úıdi tirkeý, esepke alý jáne bólýdi Otbasy bankiniń quzyretine berý usynylady.
Zań jobasynda áskerı qyzmetti atqarý, quqyqtyq tártipti qorǵaý kezinde, sondaı-aq adam ómirin qutqarý kezinde qaza tapqan adamdardyń otbasyn bir jyldan keshiktirmeı turǵyn úımen qamtamasyz etý boıynsha norma engizilgen.
Zań jobasyn 2-shi oqylymǵa daıyndaý barysynda:
Birinshi. Otbasy banki ekinshi deńgeıdegi bankter júıesinde jáne depozıtterge mindetti kepildik berý júıesinde saqtalyp qaldy. Sondaı-aq Otbasy bankiniń qyzmetin lısenzııalaý da saqtalatyn bolady.
Ekinshi. Zań jobasyna «satyp alý quqyǵynsyz» azamattarǵa jalǵa berilgen turǵyn úılerdi – endi «jekeshelendirý quqyǵyn berý» týraly usynys engizildi.
Búgingi tańda satyp alý quqyǵynsyz beriletin turǵyn úıler – halyqtyń áleýmettik osal toptaryna ǵana beriletini belgili. Bul azamattarǵa jalǵa beriletin baspanany jeke menshik retinde qaldyq qunymen alýǵa múmkindik beredi.
Mundaı jańa jekeshelendirý quqyǵyn – barlyq óńirlerde 51 myń halyqtyń áleýmettik osal toptarynyń azamattary paıdalana alady.
2017 jyldan beri qaıtarymsyz negizde jalǵa beriletin turǵyn úı qurylysyna respýblıkalyq bıýdjetten 418 mlrd teńgeden astam qarajat bólindi jáne óńirlerde 51 myń páter salynyp, berildi («Nurly jer» memlekettik baǵdarlamasy aıasynda).
Úshinshi. Jalǵyz baspanasy «apatty turǵyn úı» dep tanylǵan úıdiń ornyna berilgen turǵyn úıdi jekeshelendirý quqyǵyn berý engizilip otyr. Ol qoldaý tapty. Bul usynys 1600-den astam azamattyń máselesin sheshýge baǵyttalǵan.
Tórtinshi. «Turǵyn úı qatynastary týraly» zańnyń 13-babynyń 8-tarmaǵyna sáıkes memlekettik turǵyn úı qorynan turyp jatqan úılerdi 11 sanatqa (soǵys ardagerleri; 1 jáne 2 toptaǵy múgedekter; qyzmet barysynda qaza tapqan áskerı qyzmetshiler men quqyq qorǵaý organdary qyzmetkerleriniń otbasy músheleri; ıadrolyq synaqtardan zardap shekken azamattar jáne t.b.) «menshigine óteýsiz alýǵa» qoldanystaǵy quqyq saqtaldy.
Besinshi. Asyraýshysynan aıyrylǵan adamdardyń múddelerin qorǵaý maqsatynda «jesirler» sanaty – jeke derbes sanatqa bólindi. Ol, halyqtyń áleýmettik osal toptary tizimine jańa sanat retinde qosyldy.
«Jesirler – asyraýynda kámeletke tolmaǵan balalary bar jáne kúndizgi bólimde oqıtyn balalary bar, biraq olar jıyrma úsh jasqa tolǵanǵa deıin».
Sondaı-aq jekelegen normalardy naqtylaıtyn jáne zań jobasynyń mazmunyn jaqsartatyn túzetýler engizildi.
Qyrmyzy JUMAǴALIQYZY,
EUÝ stýdenti