Byltyrǵy 1 shildeden bastap elimizde Áleýmettik kodeks kúshine enip, zeınetaqy júıesine biraz ózgeris endi. Áıelderdiń zeınetke shyǵý jasy 2028 jylǵa deıin 61 jas bolyp bekitildi. Ana men balany qorǵaý júıesinde de eleýli ózgeris bar. «Altyn alqa» men «Kúmis alqa» ıelengen analar járdemaqylarynyń mólsheri saralanyp, bala kútimimen otyrǵandar bir jarym jasqa deıin járdemaqy alýǵa múmkindik aldy.
Sondaı-aq osy Áleýmettik kodeks aıasynda múgedektigi bar azamattarǵa qatysty kóptegen júıeli ózgeris engizildi. Qyzylorda oblysyna saparmen kelgen Eńbek jáne halyqty áleýmettik qorǵaý vıse-mınıstri Nazgúl Saǵyndyqova oblys turǵyndarymen kezdesýde áleýmettik qoldaýdyń osyndaı qadamdary týraly keńinen aıtty.
Qazir ataýly áleýmettik kómekti eseptegende óńirlik eń tómengi kúnkóris deńgeıine mán bersek, 2025 jyldan bastap bul esepteýlerde medıanalyq tabys negizge alynady. Bul AÁK mólsherin birshama kóteredi.
«Ataýly áleýmettik kómekti eseptegende tabys kózderin ǵana emes shyǵysty da eskerý óte mańyzdy. Memleket basshysynyń bastamasymen qolǵa alynǵan bul jańalyq keler jyly júzege asyryla bastaıdy. Jalpy, Áleýmettik kodeks aıasynda múgedektigi bar azamattardy qoldaý júıesin transformasııalaý qarastyrylǵan. Mysaly, densaýlyq saqtaý, bilim jan basyna shaqqandaǵy qarjylandyrýǵa kóship, ol salalarǵa jeke bıznes kele bastady. Osy arqyly jeke emdeý mekemeleri, jekemenshik mektepter men balabaqshalar paıda boldy. Kodeks sheńberinde endi jaqsy nátıje kórsetken jan basyna shaqqandaǵy qarjylandyrý tásili bizdiń salada da qoldanyla bastaıdy. Osy kúni aýyldarda ınfraqurylym joqtyǵynan múgedektigi bar azamattar qalaǵa kóship jatyr ǵoı. Endi bizdiń tarıfterdi paıdalaný arqyly bıznes jergilikti jerlerde azamattarǵa qolaıly jaǵdaı jasaıdy», deıdi vıse-mınıstr.
Arnaýly áleýmettik qyzmetterdiń qoljetimdiligin arttyrý jáne áleýmettik saqtandyrý júıesin jańǵyrtý máseleleri sóz bolǵan kezdesýde mınıstr orynbasary ótken jylǵy atqarylǵan jumystar qorytyndysyn da baıan etti. Mysaly, «Otbasynyń sıfrlyq kartasy» osy saladaǵy tıimdi qural bolyp otyr. Kópbalaly otbasylardy qoldaý qadamdary da nátıjesiz emes. Mysaly, 2019 jyly elimiz boıynsha osy qatarda 230 myń otbasy bolsa, bes jyl ishinde olardyń sany 2,5 esege artqan.
Vıse-mınıstr byltyr jergilikti atqarýshy bılik Qyzylorda oblysynda 366 nysandy múgedektigi bar adamdardyń barlyq sanaty úshin beıimdegenin atap ótti.
Kezdesýden keıin vıse-mınıstr turǵyndardy jeke qabyldady. Sapar aıasynda ol balalarǵa arnalǵan arnaýly áleýmettik qyzmetter kórsetý ortalyǵynyń jumysymen tanysyp, turmystyq zorlyq-zombylyqtan zardap shekkenderge áleýmettik qyzmetter kórsetetin ortalyqqa bardy.
Qyzylorda