Qyzylordalyqtardyń kommýnaldyq saladaǵy túıindi máseleniń biri ystyq sý bolatyn. Basqa qalalar turǵyndary qalaǵanynsha paıdalanatyn kádimgi ystyq sý Syrdaǵy bas qalada bas aýyrtar problemaǵa aınalǵaly da talaı jyldyń júzi aýypty. Sýdy ysytyp paıdalanǵandyqtan da syrtymyzdan «Arıstondar qalasy» dep aıdar taqqandardy da estidik. Amandyq bolsa, osy bir abyroısyz «ataqtan» arylatyn kún jaqyn qalǵan sııaqty.
Oblystyq energetıka jáne turǵyn úı kommýnaldyq sharýashylyq basqarmasynyń basshysy Medet Ýsaın bıyl Qyzylorda qalasynyń turǵyndaryna ystyq sý berile bastaıtynyn aıtyp otyr. Osy jyly oblys ortalyǵyndaǵy 187, al 2025 jyly 237 turǵyn úı ystyq sý júıesine qosylady. Eki kezeńge josparlanǵan jumystardy júzege asyrý úshin demeýshilik esebinen 32 joba ázirlenipti.
«Memleket basshysy ótken jyly óńirge jasaǵan jumys sapary barysynda Qyzylorda halqyn ystyq sýmen qamtýdy tapsyrǵan bolatyn. Osyǵan baılanysty oblys ákiminiń tapsyrmasy negizinde tıisti jumys qolǵa alyndy. Búginge deıin qalalyqtar elektr sýjylytqysh nemese gazben jylytatyn qurylǵylar arqyly lajdap kelgenin bilesizder. Mysaly, 50 lıtrlik «Arıston» qurylǵysyn ysytý úshin 3 kılovatt elektr energııasy jumsalady. Máseleni zertteý barysynda «Arıston» paıdalanatyn úı men ystyq sý júıesine qosylǵan baspanany salystyryp, ystyq sýmen qamtylǵan úıdiń shyǵyny 5 esege arzan bolatynyn anyqtadyq. Jalpy, búginde qalada ortalyqtandyrylǵan jylý júıesine qosylǵan 804 turǵyn úı bar. Osy turǵyn úılerdi ystyq sýmen qamtý úshin bıyldan bastap qurylys montajdaý jumystary bastaldy. On jeti joba boıynsha 186 kóppáterli turǵyn úıdi ystyq sýmen jabdyqtaýǵa Úkimet rezervinen tıisti qarjy bólindi. Osy joba boıynsha bıyl qalamyzdaǵy Shuǵyla, Syrdarııa, Sol jaǵalaý, Táýelsizdik, Beıbarys kóshelerindegi kópqabatty turǵyn úılerge ystyq sý júıesi júrgiziledi», dedi Medet Ýsaın.
Búginde qala ákimdigi tarapynan arnaıy jumys toby qurylyp, turǵyndar arasynda túsindirme jumystaryn bastap ketipti. Qala ákiminiń orynbasary Ǵalymjan Erkebaıdyń aıtýynsha, qazir oblys ortalyǵyndaǵy 174 úıdi ystyq sýǵa qosýǵa múmkindik bar, al 424 úı qarjylandyrýdy qajet etedi.
«Osy qarjylandyrý talap etetin turǵyn úılerdi ystyq sýǵa qosý úshin demeýshi esebinen joba ázirlendi. Turǵyndar ystyq sý jelilerin ornatýǵa ruqsat berse, jumysty der kezinde oryndap, ýaqyt únemder edik» deıdi qala ákiminiń orynbasary.
Jaz shyǵa joǵary qabattarǵa aýyzsý kóterilmeıtini taǵy bar. Buryndary tamshylap aǵyp, shydamdy taýysatyn edi. Qazirgi jaǵdaı odan áldeqaıda jaqsy. Biraq páterińde qysy-jazy sýdyń saryldap aǵyp turǵanyna ne jetsin.
«Qyzylorda sý júıesi» MKK dırektory Baýyrjan Ábdiqapparulynyń aıtýynsha, ystyq sý jelilerin júrgizý arqyly sý qysymyn áldeqaıda kóterýge bolady.
«Qaladaǵy kópqabatty turǵyn úılerge ystyq sý jelilerin júrgizý elektr energııasy men elektr qondyrǵylaryn únemdeýge septigin tıgizbek. Máselen, qala boıynsha elektr energııasyn tutyný kólemi 84 MVT bolsa, ystyq sý jelisi ornatylǵannan keıin júkteme 14 MVT-qa deıin azaıady», deıdi «Qyzylorda elektr jelilerin taratý kompanııasy» AQ basqarma tóraǵasynyń orynbasary Shalqar Rahyshev.
«Qyzylordajylýelektror-talyǵy» MKK basshylyǵynyń aıtýynsha, ystyq sý jyl on eki aı úzdiksiz beriledi. Jaqyn arada júzege asa bastaıtyn jobany kommýnaldyq saladaǵy serpilis deýge bolatyndaı.
Qyzylorda