Astanada «Amanat» partııasynyń bastamasymen bastaý alǵan aýqymdy «Taza Qazaqstan» Road-estafetasyna Qaraǵandy oblysy da qosyldy. Elordadan shyqqan eriktiler Osakarov aýdanyna jetip, jol boıynan 4 saǵattyń ishinde 13 tonna qoqys jınady.
Odan soń Kenshiler qalasyna kelip, qalanyń ortalyq saıabaǵynda án shyrqalyp, aksııa erekshe sıpatta órbidi. Saıabaqta serýen quryp júrgen qaraǵandylyqtar bos bótelkeler men qaldyq qoqystaryn arnaıy syılyqqa almastyrdy.
Jalyndy jastar shejireli Shet aýdanyna da taban tirep, birqatar ekologııalyq is-sharaǵa qatysyp, respýblıkalyq mańyzy bar tasjoldy qoqystan tazartty.
Kúni keshe Balqash qalasyna bardy. Marshrýttyń jalpy uzyndyǵy 1200 shaqyrymnan asady. Onyń biraz bóligi Qaraǵandy oblysynda.
– Qaraǵandydan bastap, Shet aýdany men Balqashqa deıin bizdiń 250-den astam erikti estafetaǵa qatysyp júr. Estafetanyń eń uzyn shaqyrymy, ıaǵnı 700 shaqyrymy Qaraǵandy oblysyna tıesili. Biz ármen qaraı estafeta jalaýyn Jambyl oblysyna tapsyramyz, – deıdi «Amanat» partııasynyń Qaraǵandy oblystyq fılıalynyń tóraǵasy Bekzat Altynbekov.
Jolǵa shyqqan eriktiler tek jol boıyn ǵana emes, avtoturaqtar men kempıngterdi de qoqys qaldyqtarynan tazartady. Eriktiler kvadrokopterlerdi paıdalana otyryp, aerobarlaý arqyly qaı jerde qoqystyń kóbin ańǵaryp alady. Jınalǵan qaldyqtar qoqys polıgondaryna tasylyp, qajet degen bólikterin qaıta óńdeýge jóneltedi.
Osy apta ishinde jas belsendiler men «Jastar rýhy» jastar qanatynyń eriktileri «Astana – Almaty» tasjoly boıynyń aýmaǵyn tazartady.
«Taza Qazaqstan» ekologııalyq aksııasyna baǵyttalǵan bul estafeta Almatyǵa deıin jalǵasady.
Munyń arqasynda kúrejoldyń jıekteri men avtoturaqtar, aıaldamalar tazarady. Jol tazalyǵyna janashyrlyq tanytqan san júzdegen jas eriktiler respýblıkalyq aksııaǵa osylaı úles qosyp júr.
Qaraǵandy oblysy