Kýrchatov qalasyndaǵy Ulttyq ıadrolyq ortalyǵynda «Atom energııasyn beıbit maqsatta paıdalaný salasyndaǵy Qazaqstan-Japonııa ǵylymı-tehnıkalyq yntymaqtastyǵyna – 30 jyl» taqyrybynda halyqaralyq ǵylymı-tehnıkalyq semınar ótti.
Japonııa uıymdarynyń 30 jyldyq yntymaqtastyǵyn qorytyndylaý, yntymaqtastyqtyń aldaǵy ýaqyttaǵy keleshegi men baǵyttaryn talqylaý maqsatyndaǵy semınarǵa Japonııanyń Atom energııasy Agenttiginiń Prezıdenti «Kogýchı», «Marubeni Utility Services», «Toshiba Energy Systems & Solutions Corporation», «Japan Atomic Power company», «Toyo Tanso Co.Ltd» jáne t.b. uıymdarynyń basshylary men mamandary qatysty.
Ortalyqtyń baspasóz qyzmeti habarlaýynsha, 90-jyldardyń orta sheninen bastap Ulttyq ıadrolyq ortalyqtyń bazasynda Japonııanyń atom energııasy jónindegi agenttigimen birlesip, natrıı salqyndatqyshy bar shapshań neıtrondardaǵy perspektıvalyq ıadrolyq reaktordyń aýyr apatymen birge júretin úderisterdi zertteý boıynsha reaktorlyq jáne reaktordan tys eksperımentterdiń EAGLE jobasy júrgizildi. Balqý zańdylyqtary, reaktordyń aktıv aımaǵy balqymasynyń baqylanatyn qozǵalysy, onyń qurylymdyq materıaldar elementterimen jáne salqyndatqyshpen ózara árekettesýi zertteldi.
Azııa elderindegi ıadrolyq kooperasııa forýmy aıasyndaǵy jobalardy ilgeriletý boıynsha jumys belsendi júrgizilip jatyr, ol japondyq áriptesterdiń bastamasymen jáne qoldaýymen uıymdastyrylǵan tájirıbe almasýǵa, ıadrolyq tehnologııalardy birlesip damytýǵa arnalǵan jyldar boıy jumys isteıtin pármendi alańdardyń biri.
Ulttyq ıadrolyq ortalyqtyń bas dırektory Erlan Batyrbekov: «Búgingi tańda biz japondyqtarmen birge atom energııasynyń artyqshylyqtaryn paıdalaný maqsatynda birlesken zertteýlerdi talqylaýdamyz. Japonııada jobalanǵan natrıı salqyndatqyshy bar shapshań neıtrondardaǵy tórtinshi býyn reaktorynyń qaýipsizdigin zertteýge arnalǵan jańa reaktorlyq jáne reaktordan tys eksperımentter júrgizilmek», deıdi.
Osyǵan deıin reaktorlyq emes qondyrǵylarda japondyq ǵalymdarmen birlesken CORMIT jobasy iske asyryldy. Bul atom stansalarynyń qaýipsizdigin aıtarlyqtaı arttyrýǵa múmkindik beredi. Semınar jumysy nátıjesinde Tokamak termoıadrolyq materıaltaný reaktory, reaktorlyq emes stendter men qondyrǵylar ǵylymı zerthanalaryna týrlar uıymdastyrylmaq.
Abaı oblysy