Jaqynda Tashkent qalasynda «Kókónis baqsha daqyldary men kartopty irikteý, tuqym sharýashylyǵynda jáne ónim óndirýde resýrstardy únemdeıtin jáne qarqyndy tehnologııalardy qoldanýdyń ǵylymı negizderi men keleshegi» atty halyqaralyq ǵylymı-konferensııa ótti. Oǵan Qorqyt Ata atyndaǵy Qyzylorda ýnıversıtetiniń ǵalymdary qatysty. Bizdiń ǵalymdar onda atalǵan joǵary oqý orny men «О́zbek kókónis, baqsha jáne kartop sharýashylyǵy» ǵylymı zertteý ınstıtýtymen ekijaqty memorandým aıasynda atqarylyp jatqan jumystarǵa toqtaldy.
Konferensııada Qorqyt Ata atyndaǵy Qyzylorda ýnıversıtetiniń Botanıkalyq baǵy men jylyjaı meńgerýshisi, aýyl sharýashylyǵy ǵylymdarynyń kandıdaty Samalbek Qosanov baıandama jasady. Ǵalym óz baıandamasynda elimizdegi qaýyn sharýashylyǵyn damytý maqsatynda Ámýdarııa men Syrdarııa ózenderi aralyǵyndaǵy ósetin qaýyn sorttarynyń quramyn taldady. Sondaı-aq osy saladaǵy ózekti máseleler men klımattyq ózgerister, qaýyndy qaıta óńdeýde sorttyq erekshelikterine mán berý, ǵalymdar men dıqandar arasyndaǵy baılanysty odan ári damytý jónindegi oılaryn ortaǵa saldy.
Qyzylordalyq ǵalymdar ózderi daıyndaǵan bes túrli qaýyn sortyn synaqtan ótkizýdi ózbek ǵalymdaryna berdi. Al olardyń erte, ortasha, kesh pisetin qaýyn sorttaryn Syr boıynda tájirıbeden ótkizedi. Budan bólek, S.Qosanov úlken ǵylymı izdenisten keıin básekege qabiletti, tasymaldaýǵa tózimdi, saqtaýǵa jaramdy, tátti qaýynnyń jańa sorttaryn shyǵaratynyn jetkizdi.
Otandyq ǵalymdardyń ǵylymı eńbekterin «О́zbek kókónis, baqsha jáne kartop sharýashylyǵy» ǵylymı zertteý ınstıtýtynyń bas dırektory, aýyl sharýashylyǵy ǵylymdarynyń doktory, professor Rýstam Nızomov joǵary baǵalady.
Aldaǵy tamyzda О́zbekstan ǵalymdary Qyzylorda oblysyna kelip, qaýyn sharýashylyǵymen tanyspaq.