Qostanaı ındýstrııalyq-pedagogıkalyq kolledjiniń 2-kýrs stýdenti Roman Govako eriktilerge arnalǵan mobıldi qosymsha jasap shyǵardy. Qosymsha jastardyń túrli volonterlik jobany izdep taýyp, olarǵa tirkelýine septigin tıgizedi. Sondaı-aq qoǵamdyq uıymdardyń eriktilerdiń jumysyn basqarýyna, úılestirýine kómektesedi.
«Biz oılap tapqan qosymsha jastardy volonterlik qozǵalystarǵa qatysýǵa yntalandyrady jáne búkil úderistiń ashyqtyǵy men árbir erikti úshin túsinikti bolýyn qamtamasyz etedi. Sonymen qatar eriktiler jumysyn avtomattandyryp, basqarýǵa tıimdi ári uıymdastyrýǵa qolaıly etedi», deıdi Roman Govako.
Jas ónertapqysh qosymshasyn ustazy Gúlnar Beıbitqalıqyzynyń kómegimen óńirdegi sý tasqynyna qarsy is-sharalar kezinde synaqtan ótkizip kórgen. «Synaq qorytyndysynda qosymsha óte tıimdi ekenin tanytty», deıdi joba jetekshisi.
Mobıldi qosymsha ár eriktiniń neshe saǵat jumys istegenin, qandaı jumys atqarǵanyn avtomatty túrde eseptep otyrady, esepteý men esep berý úderisterin jeńildetedi. Basqasha aıtqanda, eriktiler ózderi atqaryp jatqan jumystyń kólemin qadaǵalaı alady, al qoǵamdyq uıymdar qandaı da bir ıgi isti atqarysýǵa atsalysyp jatqan volonterlerdi tıimdi basqaryp, olardyń jumysyn baǵalaı alady. Qosymsha jadyna saqtalǵan málimetter keıin eriktilerdiń turaqty jumysqa ornalasýyna kómektesetin portfolıoǵa aınalady.
«Qosymshanyń kómegimen eriktiler óz jumystaryn ońaı qadaǵalap, uıymdastyrýshylarmen úzdiksiz baılanysta bolady. Qoǵamdyq uıymdar da jumystaryn sapaly josparlap, úılestire alady. Iаǵnı eriktiler men uıymdardyń birlesken is-sharalarynyń sapaly ótýine jol ashady, bul óz kezeginde eriktiler qozǵalysynyń damýyna yqpal etedi», deıdi joba jetekshisi Gúlnar Beıbitqalıqyzy.
Qostanaı oblysy