Sıfrly tehnologııa damyǵan saıyn áleýmettik máselelerdi qadaǵalaý da jeńildeı tústi. Ásirese qumar oıyndar men ártúrli qylmystyń aldyn alý júıelenip keledi. Mysaly, jaqynda ǵana esirtki qylmysynyń Digital-kartasy iske qosyldy.
Astanada esirtkini taratý, satý, satyp alý, jasyryn jarnamalaýdy joıatyn arnaıy saıt iske qosyldy. Ol saıtqa nashaqorlyqqa qatysty kez kelgen aqparatty jiberip, habarlaýǵa bolady.
– Biz Nazarbaev zııatkerlik mektebi oqýshylarynyń jobasyn qoldap, kómektestik. Digital-kartada elimiz boıynsha nashaqorlyqqa qarsy aqparattar bar. Kez kelgen adam esirtkini taratý, jarnamalaý týraly aqparatty kórse, «Esbol.kz» saıtyna kirip nemese Telegram bot arqyly bizge jibere alady. Bizge túsken aqparatty quqyq qorǵaý organdary ókilderimen birge anyqtaımyz. Bul jerde esirtkini satýshylar, taratýshylar nemese jarnama jasaýshylar ǵana emes, ony satyp alýshylar da anyqtalady. Sondaı-aq qazir esirtkini QR-kod arqyly jıi jarnamalaıtyn bolǵan. Olardy joıý boıynsha da kúres belsendi júrgizilip otyr, – dedi «Esbol» qorynyń tóraǵasy Jandos Aqtaev.
Esirtki taratý týraly habarlaǵan azamattardyń jeke basyna qatysty aqparattardyń qupııalylyǵy mindetti túrde saqtalady. Sondyqtan qylmys týraly aqparat aıtqysy keletinder esh alańdamasa da bolady. Bul karta esirtkiden saqtaý úshin ǵana emes, azamattyq belsendilikti arttyrýǵa da baǵyttalǵan. «Jumyla kótergen júk jeńil» demekshi, halyqtyń bári birikse, qylmys ta azaımaq.
– Bizdiń qor 2014 jyldan bastap jumys istep keledi, al nashaqorlyqty ınternet arqyly taratý, nasıhattaýǵa qarsy kúresti 2021 jyly qolǵa aldy. Endi osy sıfrlyq karta arqyly máselemen júıeli túrde kúrespekpiz. Elimiz boıynsha volonterler bar, olar bizge túsken aqparatty aldyn ala saralaıdy, – deıdi J.Aqtaev.
Karta qazir Astana qalasynda qanatqaqty rejimde iske qosyldy, sátti júzege asqan jaǵdaıda barlyq óńirge engizilmek.