Soltústik Qazaqstan oblysynda eń tómengi rejımdegi kolonııadan qashyp ketken sottalýshy izdestirilip jatyr, dep habarlaıdy Egemen.kz.
Qazaqstan media portalynyń jazýynsha, Soltústik Qazaqstan oblysy Qyzyljar aýdany Olshanka aýylyndaǵy kolonııadan 38 jastaǵy sottalýshy qashyp ketken.
Sottalýshy kólik urlaý jáne urlyq úshin úsh ret isti bolǵan, ol ekinshi ret jazasyn qatań tártiptegi qylmystyq-atqarý júıesi mekemesinde ótegen. 2022 jyldyń maýsym aıynda shóp shabatyn traktordy, sonymen qatar aýyl turǵyndarynyń túrli metall buıymdary men júk kóligin urlaǵany úshin 4,5 jylǵa sottaldy. Osy jyldyń 8 sáýirine deıin jazasyn qatań tártiptegi qylmystyq-atqarý júıesi mekemesinde ótep, keıin eń tómengi rejımdegi kolonııaǵa aýystyrylǵan kórinedi.
Departament ókilderi eń tómengi qaýipsizdik mekemelerinde jazasyn ótep jatqandar kolonııadan tys jerde jumys istep, jumys ýaqyty bitkende qaıtyp keletinin túsindirdi.
«Sottalýshy kolonııaǵa jumys ornynan oralmaǵan, ony izdeýge mekeme men qylmystyq atqarý júıesiniń qyzmetkerleri jumyldyryldy. Tutqyn kórsetilgen baǵyttan aýytqyp ketti, ol úshin qylmystyq kodekste jaýapkershilik kózdelgen. Oǵan zańnamaǵa sáıkes tıisti sharalar qoldanylady», dep habarlady vedomstvonyń baspasóz qyzmeti.
Qylmystyk Kodekstiń 427-babyna sáıkes, bas bostandyǵynan aıyrý ornynan tysqary jerge qysqa merzimge shyǵýǵa ruqsat etilgen sottalýshynyń shyǵý merzimi bitkennen keıin, jazasyn óteýden jaltarý maqsatynda túzetý mekemesine qaıtyp oralmaýy – eki jylǵa deıingi merzimge bas bostandyǵynan aıyrý jazasyn kózdeıdi.
Qyrmyzy JUMAǴALIQYZY,
EUÝ stýdenti