Medısına salasynda halyqqa qaltqysyz qyzmet etip, turǵyndar alǵysyna bólenip júrgen dáriger kóp.
Sonyń biri – Gúlbahar Mámbetkárimova. Shyndyǵyn aıtqanda, onyń kindik qany Atyraýda emes, Besqalada tamǵan. Al munaıly shaharǵa 2014 jyly kóship kelgen. Sodan beri №7 qalalyq emhanada jumys isteıdi.
«Ata-enem atajurtyna oralýdy oılastyryp, jańa qonys retinde Atyraýdy tańdady. Biz de birge kóship keldik. О́zim 2002 jyly Tashkent pedıatrııa ınstıtýtynyń Nókistegi fılıalyn bitirgen edim. Bul shaharǵa kelgen soń jumys izdep, osy emhana basshysyna jolyqtym. Sol kezdegi dırektor Ǵazız Esqalı aǵamyz bastaǵan ujym týysqanyndaı baýyrǵa tartty», deıdi G.Mámbetkárimova.
Ol bala kúninen dáriger bolýdy maqsat etipti. О́ıtkeni onyń áke-sheshesi de, aǵa-ápkeleri, jeńgesi men jezdesi de osy salany tańdaǵan. Olardyń jolyn balalary jalǵastyryp keledi. Osyndaı úlken áýlettiń ókilderi bas qosqanda, áńgime tıegi medısınaǵa, adamnyń densaýlyǵy, dıagnostıka men emdeý tásilderine oıysady. Bir sózben aıtqanda, otbasylyq shaǵyn konferensııa deýge bolady.
«Bolashaqta medısına salasyn tańdaıtyn bolǵandyqtan, mektepte bıologııa, hımııa pánderine kóńil aýdardym. Dáriger bolǵanyma ókinbeımin. О́ıtkeni bala kezden áke-sheshemizdiń turǵyndardyń densaýlyǵy úshin aıanbaı eńbek etkenin kórip óstim. Dárigerlik bizdiń otbasylyq kásibimizge aınaldy», deıdi G.Mámbetkárimova.
Emhanadan Gúlbahar Ábdikárimqyzyna bir emes, eki ýchaske bólingen. Onyń biri mekenjaı boıynsha aýmaqtyq bolsa, ekinshisi qosymsha retinde berilgen. Oǵan S.О́tebaev atyndaǵy Atyraý munaı jáne gaz ýnıversıteti stýdentteriniń densaýlyǵyn tekserý de júktelgen. Biraq jumystyń kóptiginen bas tartqan emes. О́ıtkeni ózimen birge jumys isteıtin medbıkeler Gúlnur Ǵalymova, Ásııa Qabdolova jáne Sálıma Nyǵmetpen birge bárine úlgeredi. Bári de bir-birin jaqsy túsinedi. Turǵyndardyń telefon qońyraýyna kezekpen jaýap beredi. Aq jeleńdilerdiń qyzmetine turǵyndar udaıy rızashylyǵyn bildirip otyrady.
«Men Atyraý qalasynyń «Aqdepo» dep atalatyn bóliginde turamyn. Jas ulǵaıǵan soń dárigerge jıi qaralýǵa týra keledi. Dáriger men medbıkelerdiń keńesin udaıy alamyn. Olar bizdi jylyshyraımen qabyldaıdy. Sypaıy sóılesedi. Daýys kóterip, qabaq shytqanyn kórmedik. Dıagnozdy dál qoıyp, tez emdeýge tyrasady. Úsh jyl buryn koronavırýs ınfeksııasymen aýyrdym. Aýrýhanalarda oryn bolmaǵandyqtan, úıde emdeldim. Sol kezde Gúlbahar Mámbetkárimova kún saıyn kelip, aýrýdyń dınamıkasyn baqylap otyrdy. Onyń em-sharasynan keıin syrqatymnan tez aıyqtym. Qazir otbasymyzben osy dárigerge qaralamyz», deıdi 65 jastaǵy Juldyz apaı.
Jaqynda Gúlbahar Mámbetkárimova jalpy tájirıbelik dárigerler arasynda ótken respýblıkalyq baıqaýǵa qatysty. Onyń osy saladaǵy ózindik tájirıbesi, emdeý tásili zerdelenip, «Úzdik otbasylyq dáriger» atandy.
«Meniń maqsatym – syrqatyna shıpa izdep kelgen pasıentterge tıimdi emdeý tásilin usyný. Bul barsha dárigerlerdiń temirqazyqtaı buljymas qaǵıdasyna aınalýy kerek. Al jetistikke jetýime qoldaý kórsetken emhana men sala basshylaryna, barsha áriptesime, ózimniń senimdi serigime aınalǵan medbıkelerdiń jumysyna rızashylyǵym sheksiz», deıdi G.Mámbetkárimova.
Atyraý oblysy