Beısenbi kúni «Amanat» partııasynyń bastamasymen onyń óńirlik jáne aýmaqtyq fılıaldary «Road» estafetasyn jáne «Taza beısenbi» aksııasyn joǵary deńgeıde uıymdastyryp, is-shara aıasynda Astana – Almaty tasjolynyń basym bóligi qoqystan tazartyldy. Bul jumysqa Almaty oblysynyń eriktileri belsene qatysty.
Nátıjesinde, «Astana – Almaty» tasjolynyń Jambyl oblysy aýmaǵyndaǵy 224 shaqyrym ýchaskede «Jastar rýhynyń» belsendileri men volonterleri jol jıeginen 10 tonnadan astam qoqys jınady. Sóıtip, eriktiler toby Almaty oblysynyń aýmaǵyna jetti. Jumyla kótergen júk jeńil demekshi, birer kúnde bas-aıaǵy 1 myń shaqyrymnan astam jol tazartyldy.
«Estafetany Jambyl oblysynan qabyldap aldyq. Qazirdiń ózinde eki oblystyń shekarasynda, ıaǵnı Qansheńgel aýlynyń mańynda Jambyl aýdanynyń 300-ge tarta turǵyny aksııaǵa qosyldy. Qarqyndy qımylmen bastalǵan tazalyq jumysyn Ile aýdanynyń Aqshı aýlynda jalǵastyrdyq. Onda belsendiler men volonterlerden bólek, jergilikti turǵyndar da jumyla atsalysty», deıdi «Amanat» partııasy Almaty oblystyq fılıalynyń tóraǵasy Qýat Baıǵojaev.
Jalpy, «Taza Qazaqstan» respýblıkalyq ekologııalyq aksııasyn ótkizý týraly Memleket basshysynyń tapsyrmasyna sáıkes Almaty oblysynda óńirdiń barlyq eldi mekenderin qamtı otyryp, tıisti jumys oryndaldy.
Atap aıtsaq, aksııany ótkizýdiń barlyq kezeńinde 19,5 myń tonna qoqys jınalyp, 6,6 myń gektardan astam aýmaq tazartyldy. Aksııaǵa 450 myńnan astam adam, 5,8 myń kásiporyn men uıym qatysqan. Aksııanyń alǵashqy aptasynda «Taza ólke» baǵyty boıynsha 11,5 myń tonnadan astam qoqys jınalyp, onyń 4 myń tonnasy qaıta óńdeýge jiberildi. Nátıjesinde, 4,7 myń gektardan astam aýmaq tazartyldy.
Bul sharaǵa 290 myńnan astam turǵyn, onyń ishinde 400 saıajaı alabynyń turǵyndary belsene qatysqanyn atap aıtqan jón. Tazartý jumystaryna 261 birlik tıeý jáne 930 birlik júk tehnıkasy tartyldy. Kópqabatty turǵyn úılerdiń 975 aýlasynda qalpyna keltirý, boıaý jáne ózge de jumystar júrgizildi.
«Kıeli meken» baǵyty boıynsha ótken aksııanyń ekinshi aptasynda mádenı mura obektilerin, eskertkishter men olarǵa irgeles aýmaqtardy retke keltirý jumystary uıymdastyryldy. Aksııaǵa mádenıet uıymdarynyń qyzmetkerleri, máslıhat depýtattary, oqýshylar, stýdentter, sportshylar men eriktilerdi qosqanda 75 myńnan astam adam qatysty. 850-den astam eskertkish, murajaı men mádenı eskertkish abattandyrylyp, 7,5 myń tonna qoqys jınaldy.
«Jasyl aımaq» baǵyty boıynsha ótken úshinshi aptasynda aksııaǵa 57 myńnan astam adam qatysyp, tazartý jumystaryna atsalysty. Mamandandyrylǵan tehnıkanyń 487 birligi jumyldyryldy. 45 myń aǵash, 5,9 myń buta, 3 myń kóshet otyrǵyzyldy. Halyqqa 10 myńnan astam kóshet satyldy. Jalpy sany 64,7 myń kóshet egildi. Oblystyń 340 myń oqýshysynyń qatysýymen «О́z aǵashyńdy otyrǵyz» aksııasy uıymdastyryldy.
Tórtinshi apta aıasynda «О́negeli urpaq» baǵyty boıynsha jumystar atqarylyp, oǵan 4,8 myńnan astam adam qatysty. 293 kóshet otyrǵyzyldy, 6 birlik mamandandyrylǵan jáne 6 birlik júk tehnıkasy tartyldy. Jalǵyz turatyn ardagerlerdiń 963 úı mańyndaǵy aýmaǵy jınaldy jáne abattandyryldy. Jınalǵan qoqystyń jalpy kólemi 49 tonnany qurady.
«Móldir bulaq» baǵyty aıasynda ótken aksııanyń besinshi aptasyndaǵy sharaǵa 27 myńnan astam adam qatysty. 413 ózenniń, kóldiń jáne sý aıdyndarynyń jaǵalaýlary tazartyldy. 424 tonna qoqys shyǵaryldy. 266 birlik tıeý jáne 348 birlik júk tehnıkasy jumyldyryldy.
«Taza Qazaqstan» aksııasy bıyl jyl sońyna deıin jalǵasatyn bolady. Bul baǵytta ákimniń birinshi orynbasary Nurlan Ábdirahym is-sharalar josparyn ázirlep, bekitti. Sonymen qatar ár aýdanda jáne Qonaev qalasynda osyndaı josparlar jeke bekitilip, júzege asatyn bolady.
Almaty oblysy