I.Jansúgirov atyndaǵy Jetisý ýnıversıteti keıingi jyldary sheteldik áriptesterimen tyǵyz qarym-qatynas ornata bastady. Ondaǵy maqsat – bilimgerlerdiń biliktiligin shyńdaý. Osy rette oqý ordasyna Polshanyń Slýpsk qalasyndaǵy Pomor ýnıversıtetiniń rektory Zbıgnev Osadovskıı men prorektory Danýta Gerchınska keldi.
Kezdesý barysynda Jetisý ýnıversıtetiniń basqarma tóraǵasy – rektor Ermek Bóribaev pen Pomor ýnıversıtetiniń rektory Zbıgnev Osadovskıı eki ýnıversıtet arasyndaǵy yntymaqtastyq jónindegi memorandýmǵa qol qoıdy. Polshalyq delegasııa ýnıversıtettiń oqytýshy-professorlyq quramymen pikir almasyp, eki eldiń bilim jáne ǵylym salasynyń damýy týraly oı bólisti.
«Búgingi kezdesý eki joǵary oqý orny arasyndaǵy baılanysty resmı túrde bekitip, aldaǵy ýaqytta bilim jáne ǵylym salasyndaǵy birlesken qyzmetimizge jol ashady. Stýdentter, magıstranttar, oqytýshylar men qyzmetkerler oqý jáne ǵylymı-ádistemelik jumystar úshin birlesken jobalar, zertteýler men ázirlemelerdi iske asyrýǵa kirisedi. Bizdiń ózara yntymaqtastyǵymyz jemisti bolady dep senemin», dedi rektor E.Bóribaev.
Memorandým aıasynda eki tarap akademııalyq utqyrlyq baǵdarlamasymen oqytýshylar men stýdentterdi almasý, birlesken zertteýler júrgizý jáne ýnıversıtettiń basqa da akademııalyq baǵyttary boıynsha jumystar júrgizýge kelisti.
Jetisý oblysy