Murat Áýezov zamanynan ozyp týǵan birtýar tulǵa der edim. Halyqtyń qamyn tereńinen oılap, jan-júregine túıgen birden-bir zańǵar esim. Ulttyń búginin ǵana emes, keshegisi men erteńin ushtastyra, keńinen tolǵana alatyn mundaı úlken júrek ıesin kórgen joqpyn.
Qoǵamdy, halyqty, memleketti alǵa súırep, mádenıetin óristetetin Murattaı azamattardyń keńes ókimeti kezinde týýy – ulttyń jetistigi men baqyty der edim. Mundaı azamattarsyz halyq ta, ult ta teńelip, qatarǵa qosylýy ekitalaı edi. Qazaq tarıhynda HH ǵasyr eń aýyr da mehnatty, almaǵaıyp zaman boldy. Quryp kete jazdadyq. 1916 jyldan, keńes ókimeti ornaǵannan bastap, ujymdastyrý qasiretin aıtyp taýysý múmkin emes. Bári – qoldan jasalǵan qastandyq. Qanshama ashtyq pen tarshylyq, qoldan qyryp jiberý áreketteri... Ol az bolǵandaı, 1937–1938 jylǵy qandy qyrǵyn kútip turdy Alash kóshbasshylaryn. Ol qyrǵyn men zulmat soǵystan keıin de tyıylmaǵanyn keńes zamanynda «Jas tulpardy» qurǵan stýdent Murat Áýezov aıta alǵanynyń ózi erlikke para-par. Murat álgindeı qastandyqtar men qyzyl qyrǵyndy tigisin jatqyza aıtyp qana qoıǵan joq, sondaı ádiletsizdikke qarsy kúrese de bildi. Almatyda nege jalǵyz-aq qazaq mektebi, respýblıkada qazaqtyń úlesi nege otyz-aq paıyz degen suraqtardy tótesinen qoıýy – ol zamanda bas ketetin is. Mádenı maıdandaǵy mańyzdy ózge de eńbekterin tizbesek te, mine, ult qandaı tulǵasynan kóz jazyp otyr... Murattyń qazasyna baılanysty qazaq halqyna kóńil aıtamyn.
Marat Sembi,
«Jas tulpar» uıymynyń múshesi, dosy