Arys jaǵasyndaǵy demalys aımaǵy

Kóshetterdi turaqty túrde tirshilik nári­men qamtamasyz etýge 400 tekshe metr bolatyn arnaıy basseın men eki dana sý aıdaý qondyrǵysy ornatyldy. Sýdy únemdeý ári ónimdilikti qamtamasyz etý úshin ár kóshettiń túbine tamshylatyp sýarý júıesi endirilgen. Janynda ornalasqan ózen sýynan qorektenýi de jemis aǵashtarynyń tez boı alyp, ónýi­ne septigin tıgizbek. Alma, órik, shab­daly, jańǵaq, tut, jıde sekil­di jemis aǵashtary tamyr jaıyp, turaqty kútimniń nátıjesinde turǵyndarǵa ári saıa, ári jemisti demalys aımaǵyna aına­lary sózsiz. Sondaı-aq jýyr­da aksııa aıasynda Arys ózeni boıyn tazalaý jumystary júr­gi­zildi. «Amanat» partııasy oblys­tyq fılıalynyń tóraǵasy Altynsary Úmbetálıev bastaǵan eki júzden asa adam «Taza beı­senbide» kórikti ólkeniń taza­lyǵyn saqtaýǵa úlesin qosty. «Ama­nat­tyqtar» tazalaǵan aýmaq­­ta­ǵy «Batys Eýropa – Batys Qytaı» halyqaralyq avtodálizi bo­ıyn­da kólik aǵyny táýlik boıy tolas­­tamaıdy. Aptap ystyqta ózen jaǵalaýyna túsip, tal-terek­tiń kó­l­eńkesinde aıaldap, dema­latyn jolaýshylardyń sany kóp. Alaıda, ókinishke qaraı, arnaıy qoqys jáshikteri orna­tyl­ǵan bolsa da, ár taldyń tú­b­ine bosaǵan shólmekterin laq­tyryp, qaldyqtaryn shashyp kete­tinderdiń qatary azaımaǵany eko­­a­ks­ııa barysynda baıqalyp otyr.

Oblysta aksııa aıasyndaǵy tazalyq, abattandyrý jumys­tary boıynsha ákimdikter men basqarmalardyń jumysy saraptalyp, reıtıngi jasalatyn bolady. Árbir basqarma ózi jetekshilik etetin mekemelerdiń tazalyq aksııalaryna qatysýyn qamtamasyz etýge tıis. Turǵyn­dar­ arasynda da túsindirý, eko­lo­gııalyq saýattylyqty kóterý jumystaryn toqtatpaý qajet. Oblys ákimi Darhan Satybaldynyń tapsyrmasy osyndaı. Al oblystyq Energetıka jáne turǵyn úı-kommýnaldyq sharýashylyq basqarmasynyń habarlaýynsha, retsiz qoqystar tez jınalatyn «ystyq núktelerge» tıisti organdardyń, polısııa departamentiniń jáne BAQ ókilderiniń qatysýymen reıdtik baqylaý turaqty júrgizilip keledi. Qazirgi tańda, qoǵamdyq oryndarda zań talaptaryn buzǵan tulǵalarǵa 14 myńnan asa hattama toltyrylyp, aıyppuldar salynǵan. Tabıǵı resýrstarǵa jaýapty basqarmaǵa qoqysty alyp ketý boıynsha eldi mekenderdi tolyq qamtý qajettiligi týraly ındıkatorlar qoıylýda. Odan bólek, kosmomonıtorıng arqyly retsiz tastalynǵan qoqystar anyqtalǵan oryndardy joıý bo­ıynsha jumystar josparlanyp otyr. «Jastar ortalyqtary», oblystyq QHA, aýyl aqsa­qal­dary, bıleri jáne basqa da yqpaldy azamattar ıgi iske ju­myldyrylady. Oblystaǵy aýdan­ ortalyqtarynda qyzmet kórsetetin 18 memlekettik kom­mýnaldyq kásiporyndy kúsheıtý maqsatynda tehnıkalardy alý boıynsha oblystyq bıýdjetten qarjy qarastyrýǵa ótinim berildi. Taldaý barysynda aýdan, qalalarǵa qosymsha 380 tehnıka qajet ekeni anyqtaldy.

Jalpy, óńirde «Taza Qazaq­stan» aksııasy sheńberinde ótki­zilgen senbilikterdiń nátıjesinde 15 449 shaqyrym jol, 1093 sharshy metr aıaqjol tazalandy. 1270 aıaldama retke keltirilse, 175 myńǵa jýyq aǵash ákteldi, 346 saıabaq jáne gúlzar retke keltirildi. Oǵan qosa 60 myń sharshy metr nemese 360 shaqyrym sý, ózen boılary tazalandy.

Túrkistan oblysy