Boz dalanyń boztorǵaıy atanǵan Kenen Ázirbaevtyń murasy máńgilik ekenine kúmán joq. Bıyl Kenekeńniń týǵanyna 140 jyl tolyp otyr. Áıgili halyq aqyny, kompozıtor, ánshi Kenen Ázirbaevtyń mereıtoıyna qatysty is-sharanyń bastaýy tulǵa týǵan topyraq Qordaı jerinen bastalýy zańdylyq sekildi.
Jambyl Jabaev, Balýan Sholaq sekildi dáýir darabozdarymen rýhanı baılanys ornatqan dańqty óner ıesi búginde qazaq-qyrǵyz halqyna ortaq tulǵaǵa aınalyp otyr. Sodan da bolsa kerek, Qordaı topyraǵynda ótken «Alataýdyń bulbuly» atty halyqaralyq festıvalǵa asyqqan Alataýdyń arǵy betindegi súıegine óner qonǵan oǵlandar Táńirtaýdyń bergi betine asty, olardy qordaılyqtar baýyrǵa basty.
Iá, mereıtoı aıasynda uıymdastyrylǵan is-sharaǵa aıyr qalpaqty aǵaıyndardyń aqyndary men manasshylary arnaıy at basyn burdy. Kenen ónerine bas ıgen olar osylaısha iltıpat kórsetti. О́ńirdiń aıtyskerleri men jyrshy-termeshileri de Qordaı tórinen tabylyp, aýdandyq mádenıet úıinde ótken is-sharanyń kórkin qyzdyrdy.
«Qordaıdyń ǵana emes, qazaq dalasynyń maqtanyshyna aınalǵan Kenen Ázirbaevtyń mereıtoıyna oraı qolǵa alynǵan is-sharaǵa elimizdiń ár qıyryndaǵy talanttar ǵana emes, baýyrlas eldiń manasshylary men aqyndary da kelip jetti. Bul – biz úshin úlken mártebe. Osylaısha, olar aqynnyń murasyna qurmet kórsetip otyr. Osynyń ózi-aq dańqty daryn ıesiniń murasy eshqashan ólmeıtindigin aıqyndap tur emes pe?» deıdi aýdan ákimi Bekzat Bolatbekov.
Qońyrlatyp án salǵan qordaılyq ónerpazdar qonaqtardy sán-saltanatymen kútip alǵan soń aýdan basshysy kórshi elden kelgen mártebeli meımandarǵa degen qurmetin kórsetip, arnaıy syı-sııapat usyndy. Ýaqytynda talaı iri dodada atoı salǵan Kúmiskúl Sársenbaeva jyrdan shashý shashyp, eki el arasyndaǵy dostyq pen baýyrmaldyqty shuraıly shýmaqtaryna arqaý etti.
Eldik pen birlik, baýyrmaldyq máseleleri, Kenen shyǵarmashylyǵy áńgimege arqaý bolǵan is-shara barysynda qyrǵyzdardy bastap kelgen Azız Bımyrzauly men oblystyq aıtys aqyndary men jyrshy-termeshiler odaǵynyń tóraǵasy Ahmetjan О́zbekov eki eldiń tól ónerin órkendetýge baǵyttalǵan memorandýmǵa qol qoıdy.
Ulttyq ónerdiń órine shyǵyp, tórinde qalǵan Kenen Ázirbaev murasy dáriptelgen festıval barysynda eki eldiń ónerpazdary ónerlerin ortaǵa saldy.
Aıyrqalpaqty aǵaıyndar tarapynan birneshe elaralyq aıtystyń jeńimpazy Mambettokto Mambetorozo, manasshy Tólóbek Musauly, tókpe aqyn Týrat Jumashev, termeshi Bakyt Akmatov sahnaǵa kóterilse, qazaqtar jaǵynan «Jeti qazyna» jobasynyń júldegeri Mereı Abýeva, kúıshi Dıdar Basyqaraev, aıtysker aqyndar Áset Dúısebaev pen Nurlybek Qurmanov óner kórsetti.
Eki eldiń sóz ustaǵan azamattary bul kúni alqyn-julqyn aıtysqa túsip, qandaı da bir báıgege talasqan joq. Kenen murasynyń tereńdigi men kemeldigi, ómirsheńdigi týraly tereńnen tolǵandy. Eldik pen birlikti, baýyrlas elderdiń tatýlyǵyn shuraıly shýmaqtaryna syıǵyzyp, pendeshilik ataýlyǵa parasat bıiginen qarady.
Keıinnen jambyldyq aıtyskerler men qyrǵyz elinen kelgen ónerpazdar shaǵyn fýtboldan joldastyq kezdesý ótkizip, ashy terin shyǵardy. Munda da dostyq jeńdi. Áıtse de, qonaq syılap úırengen jambyldyq oǵlandar fýtbolǵa tigilgen júldeni qonaqtarǵa tartý etip, kisilik kórsetti.
Jambyl oblysy,
Qordaı aýdany