Shámshııabanýdyń burymy

Jaqynda qara shańyraq Qarsaqbaıda bolǵanymyzda, ólketanýshy Tońbolat Muhan­ulymen kezdesýdiń sáti tústi. Ol ólkeniń keshegisin de, bú­ginin de jaqsy biletin, Qar­saqbaıǵa qandaı qonaq keledi, solardyń bárimen dıdarlasyp, áńgime-dúken qurýǵa yntyq kisi. Sol joly ol kisiden biz de bir keremet áńgime estidik.

«2023 jyly Qarsaqbaıǵa Álkeı Mar­ǵulannyń qyzy, halyqaralyq Á.Marǵulan qorynyń vıse-prezıdenti Dánel Marǵu­lan jáne Zeıin Sátbaevtyń shóberesi, saıası ǵylymdar doktory, fılosofııa, saıasattaný jáne dintaný ınstıtýtynyń jetekshi ǵy­lymı qyzmetkeri Ádil Júni­sov keldi. Ulylardyń urpa­ǵyn quraq usha qarsy aldyq, jaqsy-jaqsy áńgime-syrǵa qanyqtyq. Maǵan, ásirese Ádildiń áńgimesi óte qatty áser etti», degen Tońbolat aǵa bizge sol áńgimeni ádemilep oty­ryp jetkizdi.

«Orazaı aǵa Shámshııabaný apamyz ómirden ótken soń, onyń rýhyn aıalaýmen, ar­daq­taýmen ótti. Bir kúni úıine barsam, aǵa úıdegi zattardy aqtaryp áldene izdestirip jatyr eken. Men «Aǵa, ne iz­destirip júrsiz? Múmkin men biletin shyǵarmyn», dep edim, ol kisi «Shámshııabaný­dyń shashy bar edi, saqtap jú­retinmin, sony taba almaı jatqanym», dedi. Al men bul jaǵdaıdan habardar edim. Orazaı aǵa birde úı­degi qumyralardyń ishinen aq shúberekke oralǵan shashty alyp shyǵyp kórsetken bolatyn. Sosyn onyń tarıhyn aıtqan edi. Shámshııabaný apamyz kezinde shashyn qıdyrǵanda, qıylǵan shash­ty shashtarazǵa tastap ketpeı, úıine alyp kelip saq­tap qoıǵan kórinedi. Apaı dúnıeden ótken soń, Orazaı aǵa saǵynyshyn basý úshin shúberekke oralǵan shashty alyp, bir mezgil ıiskep otyrady eken. Men bir bar­ǵanymda sondaı sáttiń ústinen túskenmin. Sonda aǵa maǵan: «Er­teń men dúnıeden ótkende ata-babamnyń jatqan jerine, Qarsaqbaıdaǵy qorymǵa baramyn. Biraq Shámshııabaný­dyń mynaý shashyn da menimen ­birge jerleńder» dep, qolyn­daǵy aq shúberekti qumyranyń ishine salǵan edi. Shamasy, sony esinen shyǵaryp alsa kerek. Men dereý taýyp ber­dim. Sonda aǵa maǵan: «Durys boldy ǵoı, ­Endi muny kóri­ne­tin, keıin óziń qınalmaı ta­ýyp alatyn jerge aparyp qoı» dep tapsyrdy. Aǵa­ny Qarsaqbaıdaǵy qorymǵa áke­lip jerlegende apaıdyń aq shúberekke oral­ǵan shashyn da birge kómgen bolatynbyz». Tońbolat aǵanyń Ádil Júnisovten estigen áńgimesi osy.

Orazaı Batyrbekov kópte­gen jyl boıy partııa qyz­metinde bolǵan, Almaty par­tııa mektebin on úsh jyl bas­­qarǵan azamat edi. Qanysh Sátbaevtyń kúıeý balasy bolý baqyty buıyrǵan Orekeń de tekti tuqymnyń tuıaǵy bolatyn. Týǵan jerdiń tó­sinde tynys­taýdy uıǵarǵa­ny da sol tektiliktiń bir bel­gisi dese bolǵandaı. Al Qanysh atamyzdyń qy­zy Shámshııabaný apamyzdyń qıyl­ǵan sha­­shyn shashtarazda qal­dyryp ketpeı, úıine ákelip saqtap qoıǵany da, keremet emes pe?

Ádette erli-zaıyptylar o dúnıede de qatar jatqandy qalaıdy. Sonymen birge ata-baba qorymy, kindik qany tam­ǵan topy­raqta máńgilik jaı tabý deıtin qasterli túsinikter de bar. Orazaı aǵamyz sol ekeýin qalaı qııýlastyra bil­gen deseńizshi! Ol adal ja­ry­nyń burymyn janyna alyp, ata-babalary jatqan to­pyraqqa kelip máńgilikke jaı tapty.

Ulytaý oblysy,

Qarsaqbaı kenti