Kókshetaý qalasynyń kópbalaly, áleýmettik jaǵynan az qamtylǵan otbasylary shattyqqa bólengen kún boldy bul. 63 otbasy baspanaly bolyp, qýanyshqa keneldi.
Páterli bolǵandardyń 43-i kópbalaly otbasy bolsa, 20-sy – osy bir sátti sarǵaıyp tosqan jetim balalar. Qoldaryna jańa da jaryq, sáýletti páterlerdiń kiltin ustap turyp, ısi musylman úshin qasıetti Qurban aıt merekesinde jaqsylyqqa qaryq bolǵandaryn jaqsy yrymǵa balasty. Memleket basshysy Qasym-Jomart Toqaev Biryńǵaı turǵyn úı saıasatyn jaqsartý boıynsha tapsyrma bergen edi. Úkimet osy baǵytta naqty sharalar qabyldap, óńirlerde oblys basshylyǵy daıyn páterlerdi satyp alyp, halyqtyń áleýmettik jaǵynan az qamtamasyz etilgen toptaryna bere bastady.
– Búgin Memleket basshysynyń tapsyrmasyna sáıkes jekemenshik qurylys kompanııalarynan daıyn páterlerdi satyp alyp, kópbalaly jáne áleýmettik jaǵynan az qamtylǵan otbasylarǵa berýdemiz. Bul izgi joba halyqtyń áleýmettik-turmystyq jaǵdaıy men ómir súrý sapasyn jaqsartýǵa arnalǵan, – dedi oblys ákimi Marat Ahmetjanov óz sózinde. – Jyl sońyna deıin osy baǵdarlama boıynsha 841 otbasy jaıly páterlerge ıe bolady dep josparlanyp otyr. Onyń ishinde Kókshetaý qalasy boıynsha 500 páter berilse, qalǵandary oblystyń qalalary men aýdandarynda beriledi. Keıingi bes jylda munsha páter berilmegen eken. Bir aıta keterligi, bul kúni jospar boıynsha Qosshy qalasy men Zerendi, Býrabaı aýdandarynda da joǵaryda atalǵandaı toptarǵa 201 páter tapsyryldy.
Baspanaly bolǵandardyń qýanyshtarynda shek joq deýge bolady. Kóńilderi kóterińki. Keýdelerin kernegen sezimderin jasyra almaı, kóz jasyna da erik berip júr.
– Memleket basshysy men jergilikti atqarýshy organdarǵa aq alǵysymyzdy jetkizgimiz keledi, – deıdi jeti balanyń anasy Anna Býrkova. – Biz ózimiz tirnektep qarajat jınap mundaı úıdi ala almas edik.
О́ńir basshysy jýrnalıstermen tildesken kezinde páterlerdiń sapasy men jaılylyǵyna aıryqsha mán beriletinin aıtyp ótti. Tek jańa páterler ǵana satyp alynady eken. Birinshi kezekte Kókshetaý qalasynyń turǵyndaryna 129 páter berý kózdelgen. Búgin 36 otbasy baspanaly bolsa, kelesi aptada taǵyda 38 páter berilmek. Bul maqsatqa bıýdjetten 16 mıllıard teńge qarajat qarastyrylǵan. Keıin páterli bolǵan otbasylar qoldanystaǵy zań aıasynda tıisti somasyn tólep, jekeshelendire alady. Jyl sońyna deıin oblysta jalǵa beriletin jáne nesıelik baspana baǵdarlamalary aıasynda 1 500-ge jýyq otbasy páterli bolmaq.
Jańa úılerde barlyq jaǵdaı qarastyrylǵan. Aýlasynda balalardyń oıyn alańdary bar.
– Páter kezegine turǵanyma on jyldan asty. Men úsh myńynshy bolyp tur edim. Ol kezde balalarym kishkentaı edi, – deıdi Gúlnár Qojahmetova esimdi jalǵyzbasty, kópbalaly ana. – Kúıeýim de ómirden ótip ketti. Búgin osyndaı jaqsylyqtyń bolǵanyna sener-senbesimdi bilmeı turǵan jaıym bar.
Dana halyq «Úıi joqtyń kúıi joq» dep tegin aıtpasa kerek. Baspanaly bolǵan otbasylar óz shańyraqtarynda shattyqtyń nury sebezgilep turatynyna senimdi.
Kókshetaý