Semeıde fýtboldan Qazaqstan premer lıgasynyń 11-týr oıyndarynda «Aqtóbe» men «Elimaı» fýtbol klýbtary ózara kim myqtyny sarapqa saldy. Úzdikter qataryndaǵy Semeıdiń fýtbol klýby týrnır kestesinde alshań basqan Aqtóbeniń fýtbolshylaryn óz alańynda qabyldady.
Bastaýyn ótken ǵasyrdyń onynshy jyldarynan alatyn, «Iаrysh» sapynda teńbil dop tepken Muhtar Áýezovke baryp tarıhtyń bir ushy tireletin Alash fýtbolynyń Otanyna balanǵan Semeı fýtbolynyń jaǵdaıy 2022 jylǵa deıin on-on bes jyldyń muǵdarynda álsirep ketkeni ras. Byltyr óz alańynda birde-bir jeńilis tirkemeı, jankúıerlerin tánti etken «Elimaıdyń» ekpini qatty ekeni ras. Sodan keıin de «Aqtóbe» men «Elimaı» arasyndaǵy oıyn fýtbol áýesqoılarynan bólek mamandardyń erekshe mańyz beretin matchtarynyń biri boldy.
Úsh márte Qazaqstan chempıony, el kýboginiń ıegerleri oıyn bastala sala qonaqtardyń qaqpasyn torýyldap ábden sastyrdy. Alǵashqy mınýttarda-aq dúrkin-dúrkin shabýyldaı tústi. «Aqtóbe» qorǵaýshylary arasynan sýyrylyp shyqqan Ndıp Tambtyń soqqan goly tóreshi sheshimimen esepke alynbady. О́ıtkeni oıynnan tys qalǵan. Esep ashýdy kózdegen aqtóbelikter degenine jetip, 25-mınýtta aıyp alańynyń syrtynan aılasyn asyrǵan Jaıro Jan jankúıerlerin qýantyp komandasyn alǵa súıredi. Birinshi taımnyń qalǵan jıyrma mınýtynda jandármen shabýyldaǵan «Elimaı» tóreshi qosqan ekinshi mınýtta esepti teńestirdi. Semeıdegi «Spartak» stadıonyndaǵy toǵyz myń kórermenniń kózaıymyna aınalǵan belorýssııalyq jartylaı qorǵaýshy Nıkıta Korzýn.
Osylaısha, matchtyń birinshi taımy teń aıaqtalsa, oıynnyń ekinshi jartysy tipten tartysqa toly boldy. Qos komanda da dop ótkizip almaýdyń qamyn jasap baqsa da, jartylaı qorǵaýshy Maksım Samorodov 78-mınýtta «Aqtóbeniń» meımanasyn tasytty. Búgingi kúnge deıin óz alańynda esh jeńilmeı júrgen «Elimaı» oıynnyń sońyna qaraı tipten ekilene shabýyldaýǵa kóshti. Eńbegi esh ketpegen brazııalııalyq legıoner 86-mınýtta baspen gol soǵyp, esepti teńestirdi.
On birinshi týr oıyndarynyń nátıjesine oraı el úmitin aqtaýǵa baryn salyp kele jatqan «Elimaı» týrnır kestesinde 17 upaımen tórtinshi orynǵa taban tiredi. Al Qazaqstan sýperkýboginiń úsh dúrkin ıegerleri «Aqtóbe» bolsa 19 upaımen kósh bastap keledi.
P.S. Jalpy alǵanda ótken apta Semeı fýtbol jankúıerleri úshin óte sátti aıaqtaldy. Apta sońynda «Semeı» fýtbolzal klýby almatylyq «Qaıratty» jeńip, Qazaqstan chempıony atandy. Qatarynan jıyrma márte chempıondyq ataqpen qanjyǵasyn maılaǵan «Qaırat» Semeıdiń fýtzal klýbyna ese jiberip, 2023/24 maýsymnyń ekinshi orynyn mise tutty.
Abaı oblysy