Semeı qalasynda Aıbek Samatty halyqtyń birazy tanıdy. Ásirese ony atqaratyn qyzmetine qaraı biletinder kóp. El-jurt onyń áriptesteri arasynda abyroıǵa bólenip, qyzmet baspaldaǵynda aqyryndap alǵa jyljysa, eńbekqorlyǵynyń arqasy ekenin aıtady. Búginde ol Abaı oblysy ákiminiń apparaty uıymdastyrý jáne baqylaý-ınspektorlyq bóliminiń basshysy laýazymyn atqarady. Bul qyzmetke kirisip ketkenine bir jylǵa jýyqtady.
Otbasyndaǵy tórt balanyń tuńǵyshy Aıbek Tólegenuly Aqsýat aýdanyndaǵy Oıshilik aýylynda dúnıe esigin ashqan. Jastaıynan dombyra shertý, án aıtý sııaqty ónerge áýestenip, zamandastarynyń aldy bolyp ósti. Mektepte ár nárseni bilýge qulshynyp, janyna jaqyn pánniń barlyǵynda úzdik nátıje kórsetti. Sóıtip júrip 11 jyl zymyrap óte shyqty. Bilikti maman bolýdy armandap, Shákárim atyndaǵy Semeı memlekettik ýnıversıtetine oqýǵa tústi. Oılana kele ata-anasynyń aqylyn qup alyp, memlekettik jáne jergilikti basqarý mamandyǵyn tańdady. Aıbektiń sózinshe, bala kúngi armany áskerı qyzmetker bolý eken. Biraq armanyma jetpeı qaldym dep esh ókinbeıdi. Sebebi artynan ergen eki baýyry búginde quqyq qorǵaý men áskerı salada eńbektenip keledi.
2009 jyly qolyna dıplomyn alyp, «Jastar praktıkasy» baǵdarlamasymen Semeı qalasynyń ishki saıasat bóliminde mamannyń kómekshisi bolyp eńbek jolyn bastady. Aınalasyndaǵy dos-jarandary «jastaıynan ómirin ákimdikke arnaǵan» dep ázildese de, 2015 jylǵa deıin qalalyq ákimdikte kompıýter tehnıkasynyń operatory, bas mamannyń mindetin atqarýshy, bas maman, Semeı qalasy ákiminiń kómekshisi qyzmetterin atqardy.
Sodan keıin de ishki saıasat bólimindegi aqparattyq nasıhat jumysy sektorynyń meńgerýshisi, bólim basshysynyń orynbasary, ishki saıasat bóliminiń basshysy laýazymyn oıdaǵydaı atqaryp, áriptesteri arasynda da, el ishinde de abyroı-bedeli bıiktedi. Jaqsy adamnyń jerde qalmaıtyny sııaqty isker mamannyń qaı kezde de suranysqa ıe ekeni beseneden belgili. Tapsyrmany tap-tuınaqtaı oryndaıtyn qyzmetker – qaı kezde de taptyrmaıtyny basy ashyq másele.
2022 jyly baǵyn synap Shyǵys Qazaqstan oblysy ishki saıasat basqarmasyna qarasty Shyǵys Qazaqstan oblysy Qazaqstan halqy Assambleıasynyń hatshylyǵy jáne etnosaralyq qarym-qatynas monıtorıngi bólimi basshysy laýazymyna taǵaıyndaldy. Tartynyp qalǵan joq. Talmaı eńbek etti. Aıbek Tólegenuly ol kúnder esinde erekshe qalǵanyn jasyrmaıdy. Qyzmet babymen basqa qalaǵa aýysqandyqtan, úsh qyzy men súıgen jary Semeıde qaldy. Turatyn úıdiń máselesi birjaqty sheshilgenshe otbasynan jyraqta júrdi. Araǵa apta salyp О́skemen men Semeı arasyn jol qylatyn. Qatty saǵynatyny úsh qulynshaǵy men týǵan qalasy Semeı edi. Sondyqtan da bolar 2022 jyly Memleket basshysynyń Jarlyǵymen oblys bolyp qaıta qurylyp, jeke otaýyn tikken Abaı óńirine apparattyń uıymdastyrý-ınspektorlyq bóliminiń bas ınspektory laýazymyna aýysyp kelýge birden kelisimin berdi.
25 jylǵy úzilisten keıin tynysy qaıta ashylyp, túlep kele jatqan oblys ortalyǵynyń ár mezeti kóz aldynda ótip jatqandyqtan, Aıbek Samat Abaıdaı alyp, Shákárimdeı kemeńger, Muhtardaı ǵulamanyń kindik qany tamǵan mekenniń bolashaǵy jarqyn bolaryna senedi. Bala kúninen jaqsy kóretini de, arasynda ózi de áýesqoı fýtbolshylar arasyndaǵy týrnırde top jaratyndyqtan, oblys bolǵaly qaıta qurylǵan «Elimaı» fýtbol klýby men «Semeı» fýtzal klýbynyń kezdesýlerin tamashalaýǵa asyǵady. Bir ózi ǵana emes qasyna kelinshegi men úsh kishkentaıyn ertip barady. «Balalarymdy ertip barýymnyń da máni tereńde. Olar búginnen bastap eline emirenip, jerine jankúıer bolǵany durys. Ákem de dál osylaı bilgenimen bólisip, talabymnyń tasqa soǵylmaýyna septigin tıgizgen edi», deıdi Aıbek.
Byltyr Abaı oblysynyń jumyspen qamtý jáne áleýmettik baǵdarlamalardy úılestirý basqarmasy basshysynyń orynbasary qyzmetin atqarǵan Aıbek Tólegenuly memlekettik qyzmetker bolý ákimdik ǵımaratynda nemese kabınette otyrǵan sátpen shektelmeıtinin, jumystan tys ýaqytta da kóńilde turatynyn aıtady. «Balańmen birge qalanyń kórikti jerlerin aralap júrgen sátte ár kún saıyn damyp, kórkeıip kele jatqan Semeıdi kórgende kóńiliń marqaıady. Týǵan ólkeńe qatysty jylt etken jaqsy jańalyqty da qýana qabyldaıtynymyz ras», deıdi ol. Shynynda da, atqaratyn jumysyńnyń nátıjesin kózben kórý, kóńilmen seziný – sózben jetkizip bolmaıtyn jaqsy dúnıe.
Úsh balany birge tárbıelep otyrǵan aıaýly jary Uljan mektepte muǵalim bolyp jumys isteıdi. Ol da el erteńi úshin esh aıanbaı, balalardyń betin bilimge buryp júr. Qara shańyraqta qalqaıyp otyrǵan áke-sheshesi – eńbek demalysynda asyǵa jetetin uldarynyń tilekshisi. Kóziniń aǵy men qarasyndaı bolǵan jalǵyz qaryndasy Jadyra – armanyna jetken qalamy júrdek jýrnalıst.
2023 jyldyń qyrkúıeginen bastap Abaı oblysy ákiminiń apparaty uıymdastyrý-ınspektorlyq bóliminiń bólim basshysy qyzmetine taǵaıyndalǵan Aıbektiń memlekettik qyzmet salasyndaǵy eńbek ótili 12 jyldan asqan. Kózdi ashyp-jumǵansha óte shyqqan ýaqyt bolǵanymen, onyń pikirinshe maqsat-muraty belgili, baǵdary aıqyn – otbasy tiregi bola júrip, balalarynyń armanyna jetýin kórý, elge adal qyzmet etý.
Ras, memlekettik qyzmet – kóp talqylanatyn taqyryptyń biri. Abyroıyn alǵa umsyna kórsetip, múmkindigin shekten tys asyra paıdalanatyndar bul qyzmettiń bedeline nuqsan keltirip júrgenin de bilemiz. Aramyzda júrgen bilikti mamandar, bilimdi jandar keýde soqpaıdy. Olar eleýsiz júrse de, ushan-teńiz eńbek sińirip, óz salasynyń tasyn órge súırep, halyqtyń qamyn jep, elge qaltqysyz qyzmet etip keledi. El erteńi bolarlyq kópke úlgi osyndaı jandardyń kóbeıgeni – kókeıdegi úlken arman.
Abaı oblysy