Batys Qazaqstan oblysyndaǵy tas jolda 22 maýsymda eki kólik soqtyǵysqan. Apat saldarynan tórt adam qaza taýyp, taǵy ekeýi zardap shekti, dep habarlaıdy Egemen.kz aqparat agenttigi.
Jergilikti «Moı gorod» portaly oblystyq polısııa departamentine silteme jasap jazǵandaı, jol apaty tańerteń Qaratóbe aýdany Qoskól aýylynyń mańyndaǵy Samara – Shymkent avtojolynda bolǵan.
«43 jastaǵy «Lada Prıora» júrgizýshisi qarsy qozǵalys jolaǵyna shyǵyp, «Mazda» kóligimen soqtyǵysqan. Apat saldarynan eki júrgizýshi de, eki jolaýshy da sol jerde qaıtys boldy. Taǵy eki jolaýshy aýyr dene jaraqatyn aldy», - delingen habarlamada.
Jol-kólik oqıǵasy faktisi boıynsha QR QK-niń 345-baby boıynsha «kólik quralyn basqaratyn adamnyń jol júrý erejelerin buzýy, abaısyzda eki jáne odan da kóp adamnyń ólimine ákep soqtyrǵany» boıynsha sotqa deıingi tergep-tekserý bastalǵany atap ótildi.