О́tken oqý jylynda oblys ortalyǵynyń oqýshylary túrli bilim dodalarynda top jaryp, halyqaralyq baıqaýlardan júldeli oraldy. Jetistikke jetken órenderge Pavlodar qalasy ákiminiń atynan 100 myń teńgelik sertıfıkat tabys etildi.
Ertis ózeniniń jaǵalaýynda ornalasqan «Ertis Promenad» sahnasynda úzdik oqýshylardyń qurmetine saltanatty kesh uıymdastyrylyp, respýblıkalyq, oblystyq olımpıadalardyń, respýblıkalyq jáne halyqaralyq zertteý jobalary konkýrstarynyń jeńimpazdary men júldegerleri marapattaldy. Aqshalaı syılyq jalpy sany 51 oqýshyǵa tapsyryldy.
Pavlodar qalasy ákiminiń orynbasary Svetlana Gladysheva oqýshylardy quttyqtap, qala basshysynyń atynan 100 myń teńge somasyna aqshalaı sertıfıkat, Alǵyshat tabys etti.
«Mundaı saltanatty is-sharaǵa daryndy oqýshylardyń qatysýy – óte quptarlyq bastama. Bizdiń qalamyzdyń oqýshylary ótken oqý jylynda 60 medal, onyń ishinde 14 altyn, 15 kúmis jáne 31 qola medal jeńip aldy. Sonyń nátıjesinde shaharymyzdyń olımpıadalyq komandasy Pavlodar oblysynyń qalalary arasyndaǵy «Úzdik olımpıadalyq komanda» ataǵyn taǵy bir márte qorǵap qaldy», deıdi «Pavlodar daryny» balalardyń bos ýaqytyn qamtý jáne daryndylyǵyn damytý ortalyǵynyń basshysy Aqmaral Muhametjanova.
Qala ákiminiń syı-qurmetine, sondaı-aq daryndy balalardy daıyndaǵan ustazdar da bólendi. Nátıjeli eńbegi men joǵary kásibı sheberligi úshin 46 pedagogke qurmet kórsetildi. Olar Pavlodar qalasy ákiminiń Alǵyshatymen marapattaldy.
PAVLODAR