Nysana kózdeýden Qazaqstan ulttyq qurama komandasynyń bas bapkeri Olga Dovgýn Parıj Olımpıadasyna qatysatyn sportshylardyń tizimin jarııa etti.
Sporttyń bul túrinen ǵalamdyq dodada júlde almaǵanymyzǵa tabany kúrekteı 28 jyl bolǵan eken. Árıne, az ýaqyt emes. Áli esimizde, 1996 jyly Qazaqstan táýelsiz memleket retinde jazǵy Olımpııa oıyndaryna tuńǵysh ret qatysyp, 11 júlde jeńip alsa, sonyń úsheýi mergenderdiń enshisinde edi. Atap aıtsaq, Sergeı Belıaevtiń ózi eki ret jeńis tuǵyryna kóterildi. 35 jastaǵy saqa sportshy myltyqty 50 metrlik qashyqtyqtan jatyp atýda kúmis medaldy ıelendi. Odan keıin ol úsh qalypta atýda dál sol nátıjeni qaıtalady. Alǵashqy jattyǵýda Belıaev germanııalyq Krıstıan Klesten qalyp qoısa, ekinshisinde fransııalyq Jan-Per Amaǵa ese jiberdi.
Taǵy bir tanymal sportshymyz Vladımır Vohmıanınniń de qanjyǵasy maılandy. 33 jastaǵy Temirtaýdyń tarlany 25 metrlik qashyqtyqtan tapansha atýda nemis Ralf Shýman men bolgarııalyq Emıl Mılovty alǵa jiberip, qola medaldy moınynda jarqyratty. Bul – onyń Olımpııa oıyndaryndaǵy ekinshi júldesi. Sodan tórt jyl buryn Vohmıanın Barselonadaǵy básekede TMD quramasy sapynda úshinshi orynǵa taban tiregen edi. О́kinishke qaraı, odan keıingi Olımpııa oıyndarynyń birde-bir otandasymyz olja sala almady.
Parıjdegi dodaǵa elimizdiń nysana kózdeýshilerin Olga Dovgýn bastap aparady. Onyń ózi de kezinde kuralaıdy kózge atqan myqty mergen bolǵanyn jankúıerler jaqsy biledi. Dovgýn 2002 jáne 2006 jyldary álem chempıony atansa, Azııa oıyndarynda 1 altyn, 2 kúmis jáne 3 qola medaldy oljalady. Bul kúnderi bas bapkerlik qyzmet atqaryp otyrǵan Olga Vıacheslavqyzy baıraqty básekede Nıkıta Chırıýkın, Aleksandra Lı, Islam Sátbaev, Konstantın Malınovskıı, Arına Altýhova jáne Irına Iýnýsmetova syndy shákirtterine senim artty. Osy alty jerlesimizdiń eń bolmaǵanda bireýi tórtjyldyqtyń basty jarysynda atoı salyp jatsa, 28 jylǵa sozylǵan sátsizdiktiń seńi sógiletin edi.