Astanada «Tumar-2024» ulttyq televızııalyq baıqaýynyń jeńimpazdaryn saltanatty marapattaý rásimi ótti. Aıta ketsek, bıyl «Tumar» báıgesi segizinshi márte uıymdastyrylyp otyr.
Baıqaýǵa 12 atalym boıynsha 300-den astam ótinish tústi. Onyń ishinde respýblıkalyq jáne aımaqtyq telearnalar, stýdııalar men kompanııalar qatysty. Qysqa tizimge 48 jumys enip, bıyl «Tótenshe jaǵdaı kezinde túsirilgen úzdik reportaj» atty jańa atalym qosyldy.
Prezıdenttiń keńesshisi – Baspasóz hatshysy Berik Ýálı «Qazsport» telearnasyna «Tumar-2024» arnaıy júldesin tabys etse, Mádenıet jáne aqparat mınıstri Aıda Balaeva «Almaty» telearnasyna arnaıy júlde tabystady. Jeńimpazdarǵa «Tumar» músinshesimen qatar, otandyq televızııa salasyndaǵy eń joǵary jetistikteri úshin 1 mıllıon teńge kóleminde aqshalaı syıaqy berildi.
Aıta keteıik, «Tumar» ulttyq baıqaýy alǵash ret 2017 jyly Mádenıet jáne aqparat mınıstrliginiń bastamasymen qurylǵan. Baıqaýdyń basty maqsaty – qazaqstandyq televızııanyń sapaly damýyna yqpal etý, televızııalyq kontent óndirisinde talantty mamandardy qoldaý jáne onyń eń myqty ókilderin madaqtaý.
Sonymen, bıylǵy baıqaýda úzdik shyqqandarǵa toqtalsaq, jańadan qosylǵan «Tótenshe jaǵdaı kezinde túsirilgen úzdik reportaj» atalymynda «Qazaqstan» telearnasynyń «Alapat tasqyn» baǵdarlamasy top jardy.
Budan bólek, «Úzdik jýrnalıstik zertteý» atalymynda «Atameken Business» telearnasynyń «Ekonomıka vs ekologııa: sý únemdeýdiń joldary qandaı?» arnaıy reportajy, «Úzdik aqparattyq baǵdarlama» atalymynda «Astana TV» telearnasynyń «Astana Times» jańalyqtar qyzmeti, «Úzdik analıtıkalyq baǵdarlama» atalymynda «Habar» telearnasynyń «Jeti kún», «Úzdik áleýmettik joba» atalymynda «Qyzylorda» telearnasynyń «Qudaıy qonaq», «Úzdik derekti fılm» atalymynda «Jibek Joly TV» telearnasynyń «Sheteldegi qazaq balalary», «Úzdik telehıkııa» atalymynda «NTK» telearnasynyń «Moshennıkı», «Úzdik óńirlik tok-shoý» atalymynda «Jetisý» telearnasynyń «Dilmar» baǵdarlamalary oq boıy ozyq shyqsa, «Úzdik óńirlik telearna» ataǵyn oraldyq «TDK-42» telearnasy ıelendi.
«Jetinshi arnanyń» «AýylDone» baǵdarlamasy balalarǵa arnalǵan úzdik baǵdarlama dep tanylsa, «Habar» telearnasynyń qyzmetkeri Grıgorıı Bedenko «Úzdik telejýrnalıst», «KTK» telearnasynyń qyzmetkeri Mádına Balǵabaeva «Úzdik telejúrgizýshi» atalymynda top jardy.