Parlament Májilisi depýtattarynyń aımaqtarǵa is-sapary bastaldy. Palata depýtattary saılaýshylarmen kezdesip, 10 shildege deıin «Amanat» partııasy Saılaýaldy baǵdarlamasy Jol kartasynyń nysandaryn aralaıdy.
Partııa fraksııasynyń músheleri Pavel Kazansev, Tatıana Saveleva, Samat Nurtaza, Marat Bashımov jáne Dúısenbaı Turǵanov Astanadaǵy «Turan» gaz jylý stansasynyń qurylysymen tanysty.
Búginde qýaty saǵatyna 250 gıgakalorıı bolatyn 4 qazandyq salý jumysy júrip jatyr. Bul qadam aldaǵy jylý berý maýsymynda elordanyń Nura aýdanynda ornalasqan turǵyn úılerdi biryńǵaı jylýmen jabdyqtaý júıesine qosýǵa múmkindik beredi. Buǵan deıin bul nysandar jeke qazandyqtardy paıdalanyp kelgen bolatyn.
«Amanat» partııasynyń saılaýaldy baǵdarlamasy aıasynda jylýmen jabdyqtaý máselelerin sheshý maqsatymen «Turan» GJS qurylysy jalǵasyp keledi. Alǵashqy qazandyq byltyr paıdalanýǵa berildi.
– Jýyrda biz «Jylý energetıkasy týraly» zań qabyldadyq. Bul qujat atalǵan saladaǵy memlekettik qadaǵalaýdy kúsheıtýge múmkindik beredi. Osylaısha, jylý jelilerin baqylaý qyzmeti jergilikti atqarýshy organdardan Energetıka mınıstrliginiń Atom jáne energetıkalyq qadaǵalaý komıtetine berildi. Astanada 2 jyl buryn jylý tapshylyǵy bolǵan edi. Alaıda ótken jylytý maýsymynda qala alǵash ret profısıtke shyqty. Buǵan «Ońtústik-Shyǵys» gaz jylý stansasy men «Turan» GJS-nyń 1 kezeńi paıdalanýǵa berilýi yqpal etti, – dedi depýtat Dúısenbaı Turǵanov.
Depýtat Pavel Kazansev jylýmen qamtamasyz etý máselesi sheshilgendikten, «Turan» GJS turǵyn úı qurylysyna serpin beretinin atap ótti.
Atap aıtqanda, Qazaqstandyq ıpotekalyq kompanııanyń turǵyn úı kesheni salynyp jatqan «Ellıngton» kópbeıindi otbasylyq oıyn-saýyq týrıstik aýmaǵyna jáne Qorǵaljyn tasjoly men Seıfýllın kóshesi arasyndaǵy ýchaskege jylý jelilerin jetkizýge bolady.
– 2023 jyldan beri profısıt deńgeıine jaqyndap kelemiz. Iаǵnı jańa úılerdi jylý jelilerine qosýǵa qatysty eshqandaı shekteý joq. Sondaı-aq jylý jelilerine baılanysty aqaý da joq. Jańadan qosylǵan 3 stansa qajetti gıdravlıkalyq rejimdi saqtaýǵa múmkindik beredi. Biz Astanany artyq shyǵynsyz jylýmen qamtamasyz ete alamyz, – dedi Astana qalasy energetıka basqarmasy basshysynyń orynbasary Maqsat Esmaǵulov.
Sapar barysynda májilismender óndiristik jáne áleýmettik nysandardy aralap, eńbek ujymdarymen kezdesýler, sondaı-aq azamattardyń jeke máseleleri boıynsha qabyldaýlar ótkizedi. Depýtattardyń óńirlerdegi sapar qorytyndysy kúzde Parlament Májilisiniń jalpy otyrystarynyń birinde jınaqtalady.