Ádil qoǵamdaǵy ádilettilik sózben emes, ispen kórinýge tıis. Onyń mysalyn jeke qoldarǵa zańsyz ótip ketken jalpyǵa ortaq múlikterdiń memleketke qaıtarylýynan, bıznestiń múddesin qorǵaý jaǵdaılarynan baıqaýǵa bolady.
Máselen, jýyrda Shymkent qalalyq prokýratýrasynyń narazylyǵymen memleketke 263 mln teńgeden astam qarjy qaıtaryldy. Mamandandyrylǵan aýdanaralyq ákimshilik sotynyń sheshimimen «Temir-Metall optom» JShS-ǵa qatysty salyqtyq tekserý aktisin jáne tekserý nátıjesi týraly habarlamany joıý týraly ákimshilik talap qanaǵattandyrylmady.
Memlekettik kirister departamenti salyqtardy jáne bıýdjetke tólenetin basqa da mindetti tólemderdi durys esepteý jáne ýaqtyly tóleý máselesi boıynsha JShS-ǵa qatysty salyqtyq qujattamalyq tekserý taǵaıyndaǵan. Tekserý qorytyndysymen habarlama berilip, oǵan sáıkes qosymsha 263 mln teńge eseptelgen.
Departamenttiń habarlamasy JShS-nyń resmı qujat aınalymy arqyly senimsiz jetkizýshilermen mámileler boıynsha shyǵystary salyq salynatyn tabystan shegerimge jatqyzylatyndyǵyna negizdelgen. JShS bul sot sheshimimen kelispeı, apellıasııalyq sotqa shaǵym túsirgen.
Shymkent qalalyq sotynyń ákimshilik ister jónindegi sot alqasynyń qaýlysymen talap qoıýdy qanaǵattandyrý týraly jańa sheshim shyǵaryla otyryp, birinshi satydaǵy sot sheshiminiń kúshi joıylǵan.
Apellıasııalyq satydaǵy sottyń materıaldyq quqyq normalaryn durys qoldanbaýyna baılanysty qala prokýratýrasy kassasııalyq ótinishhat engizip, memlekettiń múddesin qorǵady. Sonymen qatar elimizde «Bızneske jol» jobasy aıasynda 37 myńnan astam kásipkerdiń quqy qorǵaldy. Sybaılas jemqorlyqqa qarsy is-qımyl agenttigi «Bızneske jol» jobasyn iske asyryp, shaǵyn jáne orta bıznestiń naqty máselelerin sheshýge atsalysyp keledi.
Joba iske qosylǵan sátten bastap 37 myńnan astam kásipkerdiń quqy qorǵalyp, 768 problemalyq keıs sheshildi. Bıyldyń ózinde 7 myńnan astam kásipker 83 keıs boıynsha joba aıasynda kómek aldy.
Máselen, Túrkistan oblysynda fermerler úshin sýarmaly sýdyń baǵasyn kótergen deldaldyq fırmalardyń qyzmeti toqtatyldy. Endi sý jetkizýshi («Qazsýshar» ShJQ RMK) sharýashylyqtarmen tikeleı sharttar jasasady, bul baǵany 2 ese (1 myń tekshe metr úshin 766 teńgeden 421 teńgege deıin) tómendetti.
Jetisý oblysynda aqshanyń bolmaýy sebebinen sharttardy uzartpaǵan 275 mektep tamaqtandyrýshysynyń quqy qorǵaldy. Ákimdik bólingen qarajatty basqa baǵytqa aýdarǵan. Saldarynan kásipkerler 2 aı ishinde balalardy óz esebinen tamaqtandyrýǵa májbúr bolǵan. Sybaılas jemqorlyqqa qarsy qyzmettiń usynysymen qarjylandyrý qalpyna keltirilip, sharttar uzartyldy.
Joba aıasynda kásipkerlik qyzmetke zańsyz aralasý faktileriniń aldyn alý máselelerine erekshe nazar aýdarylady. Mundaı áreketter úshin sot sheshimi nemese qadaǵalaý organynyń olardy zańsyz dep taný týraly aktisi shyǵarylǵan jaǵdaıda týyndaıtyn ákimshilik jaýapkershilik kózdelgen.