Aqtoǵaı aýdanynyń Jalaýly aýlynda tasqyn sýdan zardap shekken bes otbasyǵa jańa úı salynyp berildi. О́ńir ákimi Asaıyn Baıhanov baspana kiltin ıelerine saltanatty túrde tabys etti.
Bıyl sáýir aıynda sý tasqynyna baılanysty Aqtoǵaı aýdanynyń Jalaýly aýlynda tótenshe jaǵdaı jarııalanǵan edi. Eldi mekendegi 14 úıdi sý basyp, keıin sý tasqyny kezinde zardap shekken jáne komıssııanyń sheshimimen turýǵa jaramsyz dep tanylǵan bes baspana anyqtaldy. Olardyń ornyna jańa qurylystar salyna bastaǵany týraly buǵan deıin gazet betinde jazǵan bolatynbyz.
Jalaýly aýlynyń jurty ótken jeksenbi kúni taıly-taıaǵy qalmaı baspana toıyna jınaldy. Úıleri tasqynnan zardap shekken bes otbasyǵa jańadan salynǵan sapaly úıler paıdalanýǵa berildi. «Aqtoǵaı-Agro» JShS baspanalardy 3 aıǵa jýyq ýaqyttyń ishinde aıaqtap úlgerdi. Abaı kóshesindegi dóńesteý tusta paıda bolǵan jańa ǵımarattar jaıly ári syrt kelbeti ásem etip turǵyzylǵan.
«Bıyl oblysymyz birneshe tótenshe jaǵdaıǵa tap boldy. Ásirese kóktemgi sý tasqyny eldi mekenderimizge az shyǵyn ákelgen joq. Memleket basshysy Qasym-Jomart Toqaev barlyq zardap shegýshilerge kómektesýdi tapsyrǵan bolatyn. Biz aýyldyq jerlerdiń turǵyndaryna jan-jaqty kómek kórsetýge barlyq kúsh-jigerimizdi shoǵyrlandyrdyq. Jalaýly aýly turǵyndarymen buǵan deıingi kezdesýde qatty ýaıymdaýdyń qajeti joq ekenin aıtyp, az ýaqyttyń ishinde barlyǵyn retke keltiremiz dep ýáde etkenmin. Aýyl jurtyna tótennen kelgen apattyń saldaryna moıynsunbaı, qıyndyqtarǵa tótep bergeni úshin, al óńirimizdiń ózge azamattaryna kórsetken kómekteri men demeýshilikteri úshin alǵys aıtamyn. Jańa úılerge qonystanǵan shańyraqtardyń yrys-berekesi arta bersin», dedi baspanalardyń kiltin tabystaý saltanatynda Pavlodar oblysynyń ákimi Asaıyn Baıhanov.
Sondaı-aq aımaq basshysy demeýshilik kórsetken ERG toby men «Pavlodarenergo» AQ-ǵa, sapaly úılerdi salǵan jergilikti «Aqtoǵaı-Agro» JShS qurylys kompanııasyna alǵysyn bildirdi.
Qonystoıynyń qurmetine bul kúni aýylda oblystyq «Shańyraq» halyq shyǵarmashylyǵy ortalyǵy men I.Baızaqov atyndaǵy oblystyq fılarmonııa ártisteri konsert uıymdastyrdy. Sondaı-aq ulttyq oıyndar oınalyp, balalarǵa arnalǵan oıyn-saýyqtyq is-sharalar ótti. Pavlodar oblysynyń qurmetti azamaty, mádenıet salasynyń ardageri Beısenbi Muqajanov Aqtoǵaı aýdany turǵyndarynyń atynan alǵys retinde arnaý aıtty.
Jańa baspanaǵa ıe bolǵandardyń biri – atalǵan aýyldyń turǵyny Serik Ahmetov. «Búgin óz baspanamyzdyń kiltin alyp, qýanyshqa kenelip jatyrmyz. Qurylys jumysy júrgizilip jatqanda kelip baqylap júrdik. Jaqsy salyndy dep oılaımyn, ózime unady. Úı keń ári yńǵaıly jerde ornalasqan. Jubaıym ekeýimiz tórt ul tárbıelep otyrmyz. Jeti nemerem bar. Jańa baspanamyzda úsh ulymyzben turatyn bolamyz. Basymyzǵa túsken qıyn jaǵdaıda kómekke kelgen barsha azamattarǵa, oblys, aýdan, aýyl ákimderine rahmet aıtamyn. Kórgen beınetimizdiń bári artta qalsyn. Keleshekte mundaı jaǵdaı elimizge kelmesin», dedi otaǵasy.
Smataev, Baımanov, Mýllın, Daıyrbekov otbasy – kópbalaly shańyraqtar, Kúmis alqa ıeleri. Atalǵan otbasylardyń úıleri sý tasqynynan soń jaramsyz bolyp tanylǵan. Svetlana Mýllına sý astynda qalǵan úıde bala kezinen turyp kelgenin aıtady. Qamystan salynǵan eski baspana 1985 jyly bolǵan sý tasqynyna da shydas bergen eken. Bıyl kóktemde qarǵyn sý ǵımaratty taǵy shaıyp, bul joly ol turýǵa múlde jaramsyz bolǵan.
«О́mirimde eki márte kóktemgi sý tasqynyna kýá boldym. Eń qorqynyshty apat 1985 jyly bolyp, adamdar aýyl ishinde qaıyqpen júzip júrdi. Qudaıǵa shúkir, bıyl barlyǵy aman-esen aıaqtaldy. Sý bizdiń aýylǵa 29 mamyr kúni tún ortasynda kirdi. Bıiktigi jarty metrge jetetin sýdy kórip, alǵashynda qatty qoryqqanymyz ras. Qaıda bararymyzdy, úıden qandaı zatty alyp keterimizdi bilmeı sastyq. Aınalanyń barlyǵy sýǵa tolǵandyqtan, qaıda baryp turaqtarymyzdy da bilmedik. Úıdegi zattardyń barlyǵy búlindi», dep eske aldy Svetlana sol túngi qorqynyshty apatty. Ananyń alty balasy bar, jańa úıge ol eki ulymen birge qonystandy.
Atap óteıik, atalǵan baspanalardy oblystyq ákimdikpen jasalǵan memorandým aıasynda ERG kompanııasy óz qarajatyna salyp shyqty. Qurylysyna 100 mln teńge bólindi. Demeýshiler, sonyń ishinde depýtattar aýyl turǵyndaryna tońazytqysh, teledıdar, salqyndatqysh, as plıtasy jáne ózge úıge qajet tehnıkalardy satyp alyp berdi. Qurylysty salǵan «Aqtoǵaı-Agro» JShS barlyq úıdiń sapasyna ómir boıyna kepildik berip otyr. Ár úıdiń aýmaǵy – 102 sharshy metr, ǵımarattardyń árqaısyna 200 sharshy metrdi jylytýǵa qabiletti qazandyqtar ornatylǵan. Merdiger fırmanyń basshysy Aleksandr Terentev jobalyq-smetalyq qujatta kórsetilgenniń barlyǵyn qamtydyq deıdi. Baspanalarǵa aýyz sý, káriz júıeleri, elektr jelileri tartylyp, ár úıdiń aýlasynda aýyz sý skvajınalary qazyldy. Ortalyq sý júıesinde másele týyndaı qalǵan jaǵdaıda turǵyndar álgi skvajınalardy paıdalana alady.
«О́zim Aqtoǵaı aýdanynyń týmasy bolǵandyqtan, ári anam osy óńirde turatyndyqtan, bul joba men úshin bıznes emes, áleýmettik jaýapkershilik turǵysynan mańyzdy boldy. Úıler sáýlettik turǵydan ádemi, al ishki bólmeleri otbasy músheleri úshin jaıly bolýy eskerildi», deıdi kásipker.
Oblys ákimdiginen málim etkendeı, aldaǵy ýaqytta Jalaýly aýylyna tasqyn sý qaýip tóndirmeýi úshin salynyp jatqan árqaısysy 200 myń tekshe metr bolatyn úsh qazanshuńqyrdyń qurylysy aıaqtalyp qalǵan. Aýyl turǵyndary men tórt túlikke qaýipsiz bolýy úshin jasandy sý qoımalarynyń aınalasy qorshalmaq. Nysandar shilde aıynyń sońynda tolyq aıaqtalady dep kútilip otyr.
Pavlodar oblysy,Aqtoǵaı aýdany,Jalaýly aýly