Altaıdyń jyqpyl-jyqpyl qoıyn-qonyshyn aralaı berseń, jumbaqqa toly. Adamnyń aıaǵy, týrıstiń tabany tımegen jerler qanshama? Qym-qýyt tirshiliktiń tusaýynda júrgen jan Altaıdy bir kórse, ushy-qıyry joq taıgasyn kezip, qaladan bezip ketkisi keler edi. Túneýgúni aıaqasty Bes saýsaqqa jolymyz túspesi bar ma?
Saıahattap Katonqaraǵaıǵa barǵan el Rahman men Qarakól, Irek pen Kókkól sekildi kópshilik biletin baǵyttardy ǵana mańdaıǵa alady. Odan basqa da kıeli jerler az emes-ti. Sonyń biri – kúngeı bettegi taý qýysyndaǵy Bes saýsaq edi. Izdep barar bolsańyz, jol talǵamaıtyn kólikpen Jambyl aýlynyń tusynan taý arasymen Maraldy aýlyna qaraı tartasyz. Buralańy men óri kóp joldy basyp ótip, aýylǵa eki shaqyrym jetpeı, joldan ońǵa qaraı burylsańyz, qorshaý ishindegi soqpaqpen Bes saýsaqqa týra barasyz. Ol degenimiz – dáýdiń saýsaq izderi qalǵandaı alyp tas. Jergilikti jurttyń aýzynda júrgen ańyz-áńgimelerge sensek, ertede, tym ertede dáý osynaý tasqa saýsaq izderin qaldyrsa, endi biri «paıǵambardyń saýsaǵy» degen de boljam aıtady. Keıbireýler neolıt dáýirinde qashalǵan degen de nusqa aıtqan. Ortańǵy saýsaqtyń izi úsh metrge taıaý. Tasqa bitken saýsaq izine muqııat qarasańyz, kádimgi adam saýsaǵy ispetti. Býyndaryna deıin baıqalady. Bálkim qandaı da tylsym kúsh bar ma? Al Katonqaraǵaı ulttyq memlekettik park qyzmetkerleri tabıǵattyń jaratylysy dep esepteıdi.
«Qarııalar ańyzǵa balap, Bes saýsaqty erte kezden aıtyp júretinderi esimizde. Biraq bul alyp tas sýdyń áserinen mújilgen sekildi. Jalpy, Katonqaraǵaı aýmaǵynda tasta qalǵan tylsym izder kóp. Aıaqtyń izi qalǵandaı da jartas bar. Onyń bárin arnaıy ǵylymı ortalyq zertteýi kerek shyǵar», deıdi jergilikti jýrnalıst Tımýr Smaǵulov.
Iá, Altaıdyń qoınaýy tylsymǵa toly. Ashylmaǵan jumbaǵy, aıtylmaǵan syrlary kóp. Ádemilik turǵysynan ǵana emes, ǵylymı jaǵynan da zerttelse, talaı jumbaqtyń jaýaby tabylar ma edi?
Shyǵys Qazaqstan oblysy,Katonqaraǵaı aýdany