Eýropa chempıonatynyń pleı-off kezeńi qıly-qıly nátıjesimen de jankúıerdiń jadynda saqtalary sózsiz.
Fransııa fýtbolshylary 2000 jyldan beri jalynan ustatpaı kele jatqan chempıondyq ataqtan úmitti ekenin pash etti. 24 jyl buryn qurlyq alamanynda chempıondyq tuǵyrǵa kóterilgen Fransııa quramasy 2016 jyly da fınalǵa shyǵyp, Portýgalııa quramasyna ese jibergen bolatyn.Fransııa fýtbolshylary 2000 jyldan beri jalynan ustatpaı kele jatqan chempıondyq ataqtan úmitti ekenin pash etti. 24 jyl buryn qurlyq alamanynda chempıondyq tuǵyrǵa kóterilgen Fransııa quramasy 2016 jyly da fınalǵa shyǵyp, Portýgalııa quramasyna ese jibergen bolatyn.
Dıde Deshamnyń shákirtteri bıyl báıgede bárinen qara úzip kelýden úmitti. Shırek fınalǵa shyǵar jolda Belgııa quramasyna qarsy oınap, áýpirimmen jeńdi. Bulaı deýge negiz bar. 85-mınýtta Kolo Mýanıdiń tepken dobyn bógeımin degen Iаn Vertongen aıaǵyn sozǵan, ekpindep kelgen ala dop tizesine tıip baǵytyn ózgertti. Áıtpese Belgııa quramasynyń tájirıbeli qaqpashysy Kún Kastels Mýanıdiń oıyn oqyp qoıyp, doptyń ushý baǵytyn da baǵamdap mysyqsha atylǵan. Belgııa quramasynyń bıylǵy Eýropa chempıonatyndaǵy sońǵy matchyn ótkizip, óz qaqpasyna avtogol soqqan Vertongenniń «bolysqany» arqasynda fransýz fýtbolshylary shırek fınalǵa shyqty.
Matchtyń taǵdyryn sheshken goldyń soǵylýyna Belgııa quramasynyń bas bapkeri Domenıko Tedesko qaqpashynyń esh aıyby joq ekenin basa aıtty. Rasynda da, bıyl Eýropa chempıonatynda Belgııa fýtbolshylary toptyq kezeńnen shyqqannyń ózin orasan jetistik sanar bolsa, sol bıikke jetýge zor úles qosqan oıynshynyń biri – osy qaqpashy Kastels.
Ulttyq quramanyń kapıtany Kevın De Brıoıne úshin bul sońǵy Eýropa chempıonaty bolýy ǵajap emes. 33 jastaǵy saqa fýtbolshy 2028 jyly bes el birigip ótkizetin qurlyq dodasyn kútpeýi ábden múmkin. Álemniń tańdaýly fýtbolshylarynyń qataryndaǵy Romelý Lýkaký Eýropa chempıonatynda enshisine gol jaza almaı pushaıman kúıde ketti.
Bas bapker Domenıko Tedesko toptan shyǵý jolynda shákirtteriniń az kúsh jumsamaǵanyn aıtty. «Pleı-off kezeńinde biz Fransııa quramasyna qarsy alańǵa shyǵarda olardyń qorǵanysynda aıtarlyqtaı másele bar ekenin baǵamdadyq, sondyqtan da úsh shabýylshymen suǵyna enip, gol soǵamyz dep oıladyq. Ári qorǵanystaǵy jigitter olardyń shabýyldy óristetetin vıngerin matap, adym ashtyrmaýdy mindetine aldy. Biraq avtogol match taǵdyryn sheshti», dedi maman.
Buǵan deıin Eýropa chempıony atanǵan, qurlyq dodasynyń kúmisin de, qolasyn da qanjyǵasyna bóktergen Portýgalııa fýtbolshylarynyń ekpinine Slovenııa quramasy eki taımda da tótep beredi degenge kópshiliktiń kóńili senbegen de edi. Buǵan deıin resmı matchta qos quramanyń joly túıispegen, tek osy bıyl naýryz aıynda ótken joldastyq oıynda 2:0 esebimen Matıaj Kektiń shákirtteri basym túsken-di. Biraq bul joly Slovenııa fýtbolshylary óz otyna ózi janyp ketkendeı ári-sári kúı keshti. Negizgi ýaqytta teń túsip, ekstra taımda Ronaldýdyń penaltıden tepken dobyn qaıtarǵan qaqpashy Iаn Oblaktyń batyldyǵy da quramadaǵy jigitterdiń jigerin janı almady. Matchtan keıingi penaltı serııasynda Iosıp Ilıchıch, Iýre Balkoves, Benıamın Verbıchtiń tepken dobyn Portýgalııa qaqpashysy Dıogo Koshta toıtardy. Slovenııa quramasynyń kapıtany Iаn Oblakty penaltı serııasynda synyp ketti dep sógýdiń qajeti joq. Bar qaıratyn salyp, 90 mınýt boıy ekstra taımda da qanshama joıqyn soqqylardy toıtardy. Eýropa chempıonatynyń fınaldyq kezeńine 30 jyldyń ishinde ekinshi márte qatysqan Slovenııa quramasy pleı-offqa tuńǵysh ret shyǵyp otyr. 2000 jyly ótken Eýropa chempıonatynyń toptyq kezeńinde týrnırdiń sońǵy satysyn mise tutyp, taýy shaǵylyp qaıtqan Slovenııa fýtbolshylary arada shırek ǵasyr ótkende tarıhı nátıje tirkep toptan shyqqan. Tipti Portýgalııa quramasyn da eki búktep jiberetin múmkindik boldy. Biraq myqtynyń mysy báribir basym turatynyn qarsylastary ańǵartty.
Penaltı serııasynda 3:0 esebimen ozǵan Portýgalııa quramasynyń kapıtany, qıt etse, kózine meımildep jıi jas tunatyn Krıshtıaný Ronaldýdyń enshisine taǵy bir derek tirkeldi. Ol Eýropa chempıonattarynyń penaltı serııasynda gol soqqan eń egde fýtbolshy atandy. Slovenııa qaqpasyna bıylǵy Eýropa chempıonatyndaǵy alǵashqy golyn soqqan Ronaldý keshe 39 jastan 147 kún asty.
Portýgalııa quramasynyń bas bapkeri Roberto Martınes qaqpashy Dıogo Koshtany komandanyń qupııa oıynshysy dedi. «Slovenııaǵa qarsy matchta ol bir emes, úsh seıv jasap, penaltıdiń barlyǵyn da qaıtardy. Koshtanyń bul eńbegin qalaı baǵalamaısyń? Biz munymen maqtanýǵa tıispiz», dedi bas bapker.
Eýropa chempıonattarynyń tarıhynda buǵan deıin mundaı derek tirkelgen joq. Dıogo Koshta 1960 jyldan beri ótkizilip kele jatqan qurlyq dodasynyń penaltı serııasynda barlyq soqqyny qaıtarǵan alǵashqy qaqpashy atandy.
Shırek fınalda Portýgalııa quramasy Fransııa fýtbolshylaryna qarsy alańǵa shyǵady.