Kúni keshe Glýbokoe kentinde «Birqabatty Shyǵys» baǵdarlamasy aıasynda 12 otbasyna jańa turǵyn úılerdiń kiltin tabystaý saltanaty ótti. Glýbokoe aýdanynda 2020 jyldan bastap jańa úılerdiń qurylysy júrip jatyr.
Qazirdiń ózinde 44 qospáterli 88 turǵyn úı kópbalaly jáne az qamtylǵan otbasylarǵa berildi.– Kópten kútken baspanamyzǵa qol jetkizdik. 2015 jyldan beri úı kezeginde turdym. Búgin aq túıeniń qarny jarylyp, qýanyshymyzda shek joq. Tórt balanyń anasymyn. Memleketten kópbalaly otbasylarǵa úlken qoldaý kórsetilip jatyr. Sondyqtan jergilikti ákimdikke erekshe alǵysymdy aıtqym keledi, – dep ystyq lebizin bildirdi Abaı shaǵyn aýdanynyń turǵyny Áıgerim Namazbaeva.
Aıta keteıik, byltyr osy joba aıasynda 20 úı salynǵan. Onyń ishinde jeti úı Glýbokoe aýdanyna qarasty Beloýsovka, Bobrovka, Veselovka, Praporshıkovo jáne Cheremshanka aýyldaryndaǵy kópbalaly otbasylarǵa tabys etilgen. Bul úılerdiń árqaısysynda sharýashylyq júrgizýge arnalǵan 20 gektar jer ýchaskesi bar ekenin de eske sala ketkenimiz jón. Eń bastysy, berilgen jerge dán egip, bolmasa shóbin shaýyp, tabıǵat yryzdyǵyn der kezinde paıdalana bilse, bolǵany. Baspanadan bólek jerdiń berilýi de úlken kómek.
– Glýbokoe aýdynynda oblys ákimdiginiń bastamasymen «Birqabatty Shyǵys» baǵdarlamasy damyp keledi. Bul úıler aýdan ákimi, aýdandyq máslıhat depýtattary men qoǵamdyq keńes músheleri jáne «Amanat» partııasynyń qatań baqylaýynda. Úıdiń sapaly bolýy mańyzdy. Sonymen qatar aýdanda abattandyrý jumystary qolǵa alynǵan. Qazirdiń ózinde jaryqtandyrý jumysy júrgizilip, balalar alańy salynǵan. Jaqynda asfalt tóseledi, – dedi Glýbokoe aýdandyq máslıhatynyń tóraǵasy Altaı Qalıǵojın.
«Birqabatty Shyǵys» memlekettik turǵyn úı baǵdarlamasynyń tetigi óte yńǵaıly. Merdiger óz qarajatyna baspana salyp, memleketke usynady. Barlyq tekserýden ótken soń memleket qarajat bólip, baspanalardy satyp alady. Keıinnen kezekte turǵan azamattar jergilikti atqarýshy organdar arqyly úılerge ıe bolady. Demek úılerdiń sapaly bolýy eń áýeli qurylysshynyń qyzyǵýshylyǵynda.
– Úı aýmaǵy – 85h65 sharshy metr. Gaz bloktan salynǵan. Barlyq jaǵdaı jasalǵan. Terezeler plastıkten, jerge lınoleým tóselgen. Úıdiń ishinde aqyldy pesh ornatylǵan. Qonystanyp jatqan turǵyndarǵa amandyq tileımin, – dep óz tilegin jetkizdi KTB qurylys kompanııasynyń dırektory Tilek Qońyrov.
Saltanatty is-sharada baspana kiltine ıe bolǵan azamattar bir-birine qutty bolsyn aıtysyp, jańa qonysqa kóshý qamyna kirispek.
Shyǵys Qazaqstan oblysy,Glýbokoe aýdany