Nazarbaev Ýnıversıtetiniń granttary sheteldik balalarǵa da berildi
Almatyda HI Halyqaralyq Jáýtikov olımpıadasy máresine jetti. Oqýshylar arasynda matematıka, fızıka jáne ınformatıka pánderi boıynsha ótken olımpıadaǵa Qazaqstan, Reseı, Ýkraına, Belorýssııa, Ázerbaıjan, Armenııa, Grýzııa, Qyrǵyzstan, Tájikstan, Túrikmenstan, О́zbekstan, Bolgarııa, Rýmynııa, Serbııa jáne Mońǵolııa sııaqty álemniń 15 elinen 58 komanda qatysqanyn habarlaǵan edik. Endi, mine, on jyldan beri úzdiksiz ótkizilip júrgen Jáýtikov olımpıadasynda bıyl birinshi ret O.Jáýtikov atyndaǵy Respýblıkalyq mamandandyrylǵan daryndy balalarǵa arnalǵan fızıka-matematıka orta mektep-ınternaty bas júldeni jeńip aldy.
Jeńimpazdardy marapattaý sátinde «Daryn» respýblıkalyq ǵylymı-praktıkalyq ortalyǵynyń dırektory Sholpan Qırabaeva:
– Sizderdiń qaı qıyrdan kelgenderińizge qaramastan, olımpıadaǵa TMD memleketteri túgel qatysyp otyr, alys jáne jaqyn memleketterden kelgen oqýshylar bar, barshańyzdy matematıka, fızıka jáne ınformatıka pánderine degen súıispenshilik biriktiredi. Qazaqstan Respýblıkasynyń Bilim jáne ǵylym mınıstrligi sizderdi damytyp, álemdegi eń bedeldi joǵary oqý oryndarynda bilim alýlaryńyzǵa yqpal jasaıdy, – dedi.
Sonymen, eń úzdik mamandandyrylǵan mektepter arasyndaǵy olımpıadanyń júldeli oryndaryna 7 komanda laıyq dep tanyldy.
Kúrdeli bilim jarysynda jeti márte bas júldeni jeńip alǵan Máskeý memlekettik ýnıversteti janyndaǵy mamandandyrylǵan oqý-ǵylymı ortalyǵynyń (SÝNS) komandasyn bir satyǵa artqa tastap, komandalyq esepte bas júldeni birinshi ret RMFMOMI-dyń komandasy jeńip aldy. Endigi jerde esepke júırik oqýshylar arasyndaǵy birinshi oryndy MMÝ SÝNS (Reseı), ekinshi oryndy Erevan memlekettik ýnıversıtetiniń fızıka-matematıka mektebi (Armenııa) men Sofııa matematıka mektebiniń (Bolgarııa) komandalary ózara bólisti, úshinshi oryndy Chelıabiniń №31 lıseıi (Reseı) men №199 «Komarov» mektebi (Grýzııa) jáne Belarýs memlekettik ýnıversıtetiniń lıseıi ( Mınsk qalasy) komandalary ıelendi.
Jeńimpaz komandalardyń árbir qatysýshysy baǵaly syılyqtarmen marapattaldy. Gran-prı jeńip alǵan komanda qatysýshylary ýltrabýkqa ıe boldy. 6 komanda maqtaý qaǵazdarymen marapattaldy.
Olımpıadanyń altyn medaline 31 oqýshy ıe boldy (Qazaqstan – 4, onyń 3-ýin RMFMOMI oqýshylary – Ahan Ismaılov, Oljas Qadyraqunov, Dáýlet Qurmantaev jeńip aldy). Al 60 oqýshy kúmis medal ıegeri atandy (Qazaqstan – 19 medal, onyń 6-ýy RMFMOMI oqýshylary. Qola medal ıegerleriniń sany – 87 bolsa, onyń 50-i Qazaqstanda qaldy).
Barlyǵy 176 medaldiń 50-in Qazaqstan oqýshylary jeńip alsa, onyń 20-sy RMFMOMI-ǵa tıesili. Olımpıadanyń joǵary deńgeıde ótkeniniń kýágeri boldyq, barlyq qazaqstandyq 50 balaǵa, ıaǵnı jeńimpazdar men júldegerlerge Nazarbaev Ýnıversıtettiń bilim granttary jáne osyndaı grant shetelden kelgen olımpıada jeńimpazdaryna da berildi. QBTÝ-dyń granttary tabystaldy. Ázerbaıjan ýnıversıteti (Baký qalasy) barlyq jeńimpazdar men júldegerlerge birinshi ret bilim granttaryn usyndy.
Aınash ESALI,
«Egemen Qazaqstan».
ALMATY.