Memlekettik mańyzy bar «Taldyqorǵan – О́skemen» avtojoly tolyqtaı ashyldy. Buryn ábigerge túsetin týrıster men el turǵyndary oblys ortalyǵynan 2-3 saǵatta shıpaly kólge jetip barady. Onyń ústine bıyl 300-den asa demalys orny qyzmet kórsetýge daıyn. Olardyń 2 mln-ǵa jýyq demalýshyny qabyldap alýǵa múmkindigi bar. Qazir Alakólde kún ystyq, sýǵa shomylýshylar jaǵalaýda júr.
Aldymen joldyń jaıyna úńilsek. Jalpy, «Taldyqorǵan – Qalbataý – О́skemen» jolynyń qurylysy Memleket basshysynyń nazarynan tys qalǵan emes. 2022 jyly Jetisýǵa saparynda da osy máseleni tezirek sheship, týrısterdi molynan tartý kerektigin naqtylap aıtqan edi. Jol elimizdiń úsh óńirin Jetisý, Abaı jáne Shyǵys Qazaqstan oblystaryn baılanystyrady. Búginde uzyndyǵy 768 shaqyrymdy quraıtyn jolǵa tolyǵymen asfalt tóseldi. Jaqynda Kólik mınıstri Marat Qarabaev ózi tekserip, sapasyna baǵa berdi.
«Mamandar 40 kópir men 6 ótkel qurylysyn aıaqtady. Birqatar ýchaske bıyl jazda paıdalanýǵa beriledi. Joba aıasynda Qoılyq, Balapan, Shynqoja eldi mekenderi men Aıagóz qalasynyń aınalma joldary salyndy. Joldyń 16 ýchaskesinde 1 myńǵa jýyq maman men 600 birlik arnaıy tehnıka jumyldyrylǵan. Úsharal qalasynyń mańyndaǵy kólik aıryǵyndaǵy qurylys jumystary da aıaqtalýǵa jaqyn», dedi mınıstr.
Alakól kóline ońtústik jaǵynan barý úshin «Taldyqorǵan – О́skemen» avtomobıl jolynan Jetisý oblysyndaǵy Úsharal kentine jetip, sodan keıin irgeles jatqan «Úsharal – Dostyq» jolyna ótý qajet. Kól jaǵasymen Jetisý oblysynyń Dostyq aýlyna qaraı ótetin bul ýchaskeniń uzyndyǵy 180 shaqyrymdy quraıdy.
Al «Taldyqorǵan – О́skemen» avtomobıl jolynan Alakóldiń soltústik jaǵalaýyna barý úshin respýblıkalyq mańyzy bar «Taskesken – Baqty» avtomobıl jolyna ótý kerek. Uzyndyǵy 133 shaqyrymdy quraıtyn bul ýchaske Abaı oblysynyń Maqanshy aýlyna aparady. Odan ári Maqanshy aýlynan kólge jetý úshin oblystyq mańyzy bar «Maqanshy – Jalańashkól» avtomobıl jolymen júrýge bolady.
Aıta keterligi, Alakól kóline jolaýshylar respýblıkalyq mańyzy bar «Taldyqorǵan – О́skemen» avtomobıl joly arqyly qatynaıdy. Jalpy, nysandy tolyq aıaqtap, halyq ıgiligine tapsyrý 2024 jyldyń sońyna josparlanǵan. Qazir shıpaly kólge demalýshylar osy jol arqyly júrip jatyr. Búginde 100 myńnan asa adam demalǵan.
О́ńirlik baspasóz qyzmetiniń málimetinshe, bıyl Alakól jaǵalaýynda bir jolǵy syıymdylyǵy 16,2 myń tósektik oryn bolatyn 302 týrızm nysany ornalasqan. Osy jyly jeke ınvestısııalar esebinen 1,4 mlrd teńgege taǵy
8 nysandy iske qosý josparlanyp otyr. О́tken jyly Alakólge shamamen 1,6 mln adam kelse, bıyl 2 mıllıon týrıst keledi dep kútiledi.
Oblystyq kásipkerlik jáne ındýstrııalyq-ınnovasııalyq damý basqarmasynyń dereginshe, Alakól baǵytyna jazǵy maýsymda aptasyna 28 ret Astana, Almaty, Taldyqorǵan qalalarynan 3 avıareıs barǵan. Onyń ishinde «Almaty – Úsharal» jáne «Taldyqorǵan – Úsharal» reısteri sýbsıdııalanady. 1 kommersııalyq «Astana – Úsharal» reısi bar. Oǵan qosa Almaty, Astana qalalarynan, Shyǵys Qazaqstan jáne Abaı oblystarynan 12 temirjol reısi, onyń ishinde «Astana – Dostyq» baǵytynda «Talgo» poıyzy júredi. Jazǵy ýaqytta «Almaty qalasy – Aqshı aýyly – Kóktuma aýly», «Taldyqorǵan qalasy – Aqshı aýly – Kóktuma aýly» baǵyttary boıynsha 50 oryndyq avtobýs marshrýttary turaqty túrde qyzmet kórsetedi.
Alakól kólinde oqys jaǵdaılardyń aldyn alyp, jedel den qoıý úshin TJD qutqarý bólimshesi súńgýir jabdyqtarynyń 21 jıyntyǵyn, jańa qozǵaltqyshtarmen jabdyqtalǵan 7 motorly qaıyq, 2 rezeńke qaıyq, 2 ÝAZ, Nıva, KamAZ jáne ámbebap «TREKOL» avtomashınalaryn daıyndady. Aqshı men Kóktuma aýyldarynda órt qaýipsizdigin qamtamasyz etý úshin ýaqytsha órt sóndirý beketteri uıymdastyryldy.
Atalǵan eldi mekenderge jazǵy maýsym kezeńinde táýlik boıy kezekshilik etý úshin jedel járdem dárigerleriniń eki brıgadasy jiberildi. Kóliktik baqylaý ınspeksııasy júzý quraldaryn baqylaýdy júzege asyrý úshin qaıyq satyp alyp, endi bıyl sýdaǵy qozǵalys qaýipsizdigin eki ınspektor baqylaıdy. Jaǵalaýdyń tazalyǵyn qamtamasyz etý úshin 120 qoqys konteıneri men bak, 24 sanıtarlyq-gıgıenalyq torap jáne 10 bıotýalet ornatylǵan.
Jetisý oblysy