Senat tóraǵasynyń orynbasary Olga Perepechına senatorlar Ásem Rahmetova jáne Lázzat Qaltaevamen birge Soltústik Qazaqstan oblysyna kelip, jergilikti turǵyndarmen kezdesti.
Úkimettik emes uıymdardyń ókilderimen jáne máslıhat depýtattarymen kezdesýde kóktemgi sý tasqynynyń saldaryn joıý, zardap shekkenderge áleýmettik kómek kórsetý, múgedek adamdardyń quqyqtaryn qorǵaý, taǵy basqa máseleler talqylandy.
Sondaı-aq senatorlar VIII shaqyrylymnyń II sessııasynda atqarylǵan jumystarǵa toqtaldy. Atap aıtqanda, Senat vıse-spıkeri Olga Perepechına Palatanyń 102 zań maquldaǵanyn, depýtattyq bastamalar aıasynda 33 zań ázirlenip qabyldanǵanyn atap ótti. Al Úkimet pen memlekettik organdarǵa azamattardy alańdatatyn ózekti máseleler kóterilgen 200 depýtattyq saýal joldandy.
«Biz óńirlerde halyqpen kezdesip, jurtshylyqty tolǵandyratyn máselelerdi talqylaımyz. Keıin olardy Úkimetpen birlesip, pysyqtaımyz. Biz «Halyq únine qulaq asatyn memleket» tujyrymdamasy aıasynda jumys isteımiz. Sondyqtan jumysymyzǵa syn kózben qaraýymyz kerek. Biz banktik jáne aqparattyq júıelerdiń ashyqtyǵyn kúsheıtý baǵytynda da jumys júrgizip kelemiz», dedi Olga Perepechına.
Sapar barysynda depýtattar Petropavldaǵy oblystyq perınataldyq ortalyq bazasynda ashylǵan «Qamqorlyq» erte aralasý ortalyǵyna bardy. Munda oblys turǵyndaryna tegin qyzmet kórsetiledi.