Jylt etken jańa jobany zor qýanyshpen qabyldaý – jas oblysqa tán kóriniske aınalyp tur. О́ıtkeni sol arqyly óńirdiń erteńi kóz aldymyzǵa keledi. Búgingi joba – erteńgi naqty jumys orny.
Jezqazǵan qalasynyń shetkeri jaǵynan jańa munaı bazasynyń qurylysy bastaldy. Sátin salsa, 2025 jyldyń tamyzynda paıdalanýǵa beriledi. О́ńirdiń energetıkalyq qaýipsizdigin qamtamasyz etýdi maqsat tutqan jobany iske asyrý úshin «PetroRetail PFS» JShS 4,5 mlrd teńge ınvestısııa salýdy kózdep otyr.
«Oblysta qazir bir ǵana munaı bazasy bar. Biz qolǵa alǵan joba júzege asqan kezde bul salada aımaqta básekelestik paıda bolady. Al básekelestik bar jerde, qyzmet kórsetý sapasy artady. Muny halyq jaqsy biledi», deıdi «PetroRetail PFS» JShS qurylys isteri jónindegi dırektory Andreı Iýrevıch Naýmenko.
Jańa munaı bazasy jazǵy jáne qysqy dızel otynyn, AI-92 jáne AI-95 markaly benzındi qabyldaý, saqtaý jáne bosatýǵa laıyqtalyp salynbaq. Janarmaı saqtaıtyn rezervýarlyq park kólemi ázirge 5 myń tekshe metrge josparlanǵan. Degenmen keıin onyń kólemin 10 myń tekshe metrge ulǵaıtý múmkindigi de eseptelip otyr. Jobanyń jalpy aýdany – 7 gektar. Onyń 5 gektaryna qurylys júrgiziledi.
Joba boıynsha munda 5 vagon-sısternaǵa quıylatyn temirjol estakadasy, sorǵy stansasy jáne avtosısternalarǵa quıý stansasy, transformatorlyq qosalqy stansa jáne dızeldik elektr stansasy, ákimshilik korpýs, temirjol jáne basqa da nysandar ornalastyrylady.
«Jobalardy qarastyrǵanda tek búgingi kúndi emes, keleshekti de eskerýimiz kerek. Kóp uzamaı Jezqazǵan-Qyzylorda avtojolyn kúrdeli jóndeýden ótkizý bastalady. Sol joldyń qurylysyna paıdalaný úshin de qanshama janar-jaǵarmaıǵa qajettilik týyndaıtynyn oılaı berińiz. Jol paıdalanýǵa berilgen soń Jezqazǵan arqyly júzege asatyn kólik qatynasynyń kúrt kóbeıetini aıtpasa da túsinikti. Sondyqtan «PetroRetail PFS» JShS-nyń óńirimizge kelip, ınvestısııa quıyp jatqanyna tek qýanamyz. Olardyń jumysyna sáttilik tileımiz», dedi oblys ákiminiń orynbasary Almaz Ydyrysov.
Jańa isti bastaý ońaıǵa soqpaıdy. Jas oblystyń ózindik qıynshylyqqa tap bolyp jatqany da belgili. Biraq tyǵyryqtan shyǵar jol árqashan tabylady. О́ńirge ınvestısııa tartý – sol qıynshylyqtardy eńserýdiń basty alǵysharty.
Jezqazǵanda irgetasy qalanǵan jańa munaı bazasy ınvestısııalyq múmkindikterdi iske qosý arqyly óńirdiń keleshegin kemeldendire túsýge jasalǵan kezekti qadam ispetti.