Bıylǵy jańa oqý jyly qarsańda elordanyń 5 mektebinde ınklıýzııany qoldaý kabınetteri ashylady. Tıisti synyptar «Charity Samruk Marathon 2024» qaıyrymdylyq marafonynda jınalǵan qarajat esebinen jabdyqtalady, dep jazady Egemen.kz.
Áleýmettik joba Astana qalasynyń bes bilim mekemesin, ıaǵnı №22, №36, №59, №76, №97 mektepterin qamtyp, 150-ge jýyq balaǵa qajetti jaǵdaıdy jasaýǵa múmkindik beredi. Inklıýzııa kabınetterin jabdyqtaýǵa «Samuryq-Qazyna» qoldaý bildirip otyr.
Dál osy mektepterde erekshe qajettiligi bar balalardyń sany kóp jáne qural-jabdyq pen ádistemelik járdemge muqtaj. Synyptar tórt bólek bólmeden turady: logoped, defektolog, psıholog kabınetteri jáne qysh sheberhanasy. Sonymen qatar, ár mektepte jeke emdik dene shynyqtyrý kabıneti ashylady. Muǵalimder de qajetti daıyndyqtan ótedi.
Búgin «Samruk-Kazyna Trust» KQ bas dırektory Alfııa Adıeva barlyq mektepti aralap, jóndeý jáne basqa da uıymdastyrý-ázirlik jumystarynyń barysymen arnaıy tanysty.
«Bul jobany júzege asyrý Qazaqstandaǵy ınklıýzıvti bilim berýdi damytýdaǵy mańyzdy qadam bolmaq. Jańa synyptardyń arqasynda qandaı da bir ereksheligine qaramastan barlyq balaǵa oqýǵa birdeı jaǵdaı jasalady. Osylaısha, Qor Bilim basqarmasymen birlesip, ınklıýzıvti qoldaý kabınetteri úshin ınfraqurylymnyń jańa úlgisin ázirledi. Mysaly, olardyń aýmaǵy 60-70 sharshy metrden kem bolmaýy kerek. Mektepterde jóndeý jáne basqa da synyptardy ashýǵa daıyndyq jumystary bastalyp ketti», dedi «Samruk-Kazyna Trust» jetekshisi.
Eske sala keteıik, 1 maýsymda ótken «Charity Samruk Marathon 2024» qaıyrymdylyq marafonyna 2 myńnan astam adam qatysyp, 125 mıllıon teńge jınaldy.