Almaty oblysynda fýtbolǵa erekshe kóńil bólinip jatyr. Atap aıtsaq, bir jarym jyl buryn Qonaev qalasynda fýtboldan oblystyq mamandandyrylǵan balalar men jasóspirimder sport mektebi ashylyp, búginde ár aýdanda fılıaldary turaqty jumys isteıdi.
Sonymen qatar «Ile-Alataý» kásibı klýby da qurylǵan. Ondaǵy sportshylar Qazaqstannyń 2-lıga oıynynda Almaty oblysynyń abyroıyn respýblıkalyq deńgeıde qorǵaıtyn bolady. Jasyl alań ıeleriniń básekeli jarystary jalǵasyn taýyp keledi.
Jýyrda Ile aýdanynyń ortalyǵy О́tegen batyr aýylyndaǵy jasóspirimder sport mektebiniń stadıonynda alǵash ret «Almaty oblysy ákiminiń kýbogi» úshin fýtboldan oblystyq týrnır uıymdastyryldy. Oǵan oblys aýdandary men Qonaev qalasynan iriktelgen komandalar qatysyp, tartysty oıyn órnegin kórsetti.
«Oblysta buqaralyq sportty damytýǵa memlekettik qoldaý kórsetýdiń nátıjesinde zamanaýı sport nysandary salynyp, materıaldyq-tehnıkalyq baza jańartylýda. Barlyq aýdandarda dene shynyqtyrý-saýyqtyrý keshenderi jumys isteıdi. Halyqaralyq jarystarda top jarǵan sportshylarymyzdyń jetistikteri jetip-artylady. Bıyl Parıjde ótetin Olımpııa oıyndaryna Almaty oblysy sportshylarynyń 5 lısenzııa jeńip alýy – biz úshin úlken jetistik. Osy jarysta daıyndyqtaryńyzdyń joǵary deńgeıi men sporttyq sheberlikterińizdi kórsete alatyndaryńyzǵa senimdimin», – degen óńir basshysy Marat Sultanǵazıev fýtbol komandalaryna sáttilik tiledi.
Saıysqa oblystyń barlyq aýdandary men Qonaev qalasynan 10 komanda qatysty. Tartysty týrnırdiń qorytyndysy boıynsha úzdik oıyn kórsetken Qonaev qalasynyń komandasy 1-oryndy ıelenip, jeńimpaz atandy. Al Kegen aýylynyń jastary 2-oryndy ıelense, Ile aýdanynyń fýtbol komandasy 3-orynǵa turaqtady.
Fýtbol maýsymyn ashqan bul týrnır aldaǵy ýaqytta óńirdiń barlyq aýdandarynda ótetin ala dop báıgesiniń bastaýy bolǵany anyq.
Almaty oblysy