Senat depýtaty Álisher Satvaldıev Memleket basshysy Qasym-Jomart Toqaev qol qoıǵan zańǵa qatysty pikir bildirdi, dep habarlaıdy Egemen.kz.
Eske salaıyq, Memleket basshysy «QR-nyń keıbir zańnamalyq aktilerine oıyn bıznesi, lotereıa qyzmeti, densaýlyq saqtaý, memlekettik eńbek ınspeksııasy, memlekettik baqylaý jáne artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıdy.
Senatordyń pikirinshe, Atyraý qalasynda ótken Ulttyq quryltaıdyń úshinshi otyrysynda Prezıdent tarapynan júktelgen mindet júzege asa bastady. Quryltaı barysynda el jastary erekshe táýekel tobyna jatatyny týraly másele qozǵalyp, lýdomanııa - qoǵamda beleń alǵan áleýmettik máselelerdiń biri ekeni aıtylǵan edi.
«Bul táýeldilik óskeleń urpaqqa orasan zor zııan keltiredi. Osyǵan baılanysty Qasym-Jomart Toqaev memlekettik organdarǵa azamattardyń jekelegen sanattary úshin qumar oıyndarǵa qatysty shekteý qoıý boıynsha jumysty kúsheıtýdi tapsyrdy. Bul jumystyń nátıjesi - tıisti zańnamalyq qosymshalardy ázirleý», dep jazdy senator Facebook paraqshasynda.
Eske salaıyq, zań arqyly halyqtyń oıynǵa táýeldiligin tómendetýge baǵyttalǵan shekteýshi jáne yntalandyrýshy normalar engiziledi. Atap aıtqanda, qumar oıyndarǵa/bás tigýge qatysýyna tyıym salynatyn adamdar sanatynyń tizimi keńeıtildi. Endi olardyń qataryna Boryshkerlerdiń biryńǵaı tiziliminde turǵan tulǵalar (atqarýshylyq is júrgizý boıynsha boryshkerler týraly málimetterdi qamtıtyn elektrondyq derekter banki) qosyldy. Sonymen qatar sybaılas jemqorlyqqa qarsy shekteý engizý arqyly jaýapty memlekettik laýazymdy atqaratyn, memlekettik fýnksııalardy oryndaýǵa ýákilettik berilgen adamdardyń, olarǵa teńestirilgen adamdardyń qumar oıyndarǵa/bás tigýge qatysýyna shekteý qoıylady.
Budan bylaı memlekettik qyzmetshiler, áskerı qyzmetshiler, arnaıy jáne quqyq qorǵaý organdarynyń qyzmetkerleri, bıýdjettik uıymdardyń basshylary qumar oıyndarǵa/bás tigýge qatysa almaıdy. Bul shekteýdi saqtamaǵany úshin olardy jumystan shyǵarý sharasy qarastyrylǵan. Oıyn bıznesin uıymdastyrýshylardyń qyzmetin retteý tetikteri kúsheıtildi. Týrızm jáne sport mınıstrligi oıyn mekemesiniń, býkmekerlik keńseniń, totalızatordyń, stavkalardy qabyldaý jáne qumar oıyndardyń/bás tigýdiń biryńǵaı erejelerin bekitedi.
Sondaı-aq býkmekerlik keńseler men totalızatorlardyń jarnamalaryna shekteý qoıyldy. Atap aıtqanda, býkmekerlik keńseler men totalızatorlardyń syrtqy (kórneki) jarnamasyna, sondaı-aq olardyń qyzmetin kólik quraldarynda, buqaralyq aqparat quraldarynda, kıno-vıdeo jáne anyqtamalyq qyzmet kórsetý oryndarynda jarnamalaýǵa tyıym salynady.