Bıylǵy Abaı oblysy bilim basqarmasynyń bastamasymen Semeı qalasynyń tórt birdeı oqý ornynda oqýshylarǵa arnalǵan kásiptik baǵdarlaý lageri jumysyn bastady. Onyń tórteýi kolledjder bazasynda jáne bireýi ýnıversıtette ornalasqan. Kásiptik baǵdarlaý lagerleri balalarǵa qyzyqty demalys qana emes, ártúrli salada ózderiniń kásibı daǵdylaryn damytyp, qyzyǵýshylyqtaryn jetildirýge jol ashady. Keleshekte de óz mamandyqtaryn tańdaýǵa biregeı múmkindik beretin lagerlerge bıylǵy maýsymda 400-ge jýyq balany qamtý josparlanyp otyr.
Máselen, Semeı qalasyndaǵy Geologııalyq barlaý kolledjiniń bazasyndaǵy «Jas geolog» kásiptik baǵdar berý lagerinde geologııa ǵylymyn jiti tanýǵa basa nazar aýdarylǵan. Ásirese balalardy geologııa salasyna tartý maqsatynda arnaıy ǵylymı zertteýler men týrıstik marshrýttar uıymdastyrylady. Sondyqtan oqýshylar bul lagerge oqý jylynyń ekinshi semestrinen qabyldanǵan. Kásiptik baǵdarlaý lageri úsh kezeńdi qamtıdy. Izdenisterdiń nátıjesine sáıkes 15 oqýshy Shýchınsk qalasynda ótetin geologııa salasy boıynsha respýblıkalyq jarysqa qatysyp, baqtaryn synaýǵa úmitti. Buǵan qosa, lager baǵdarlamasy aıasynda mıneralogııalyq murajaıǵa saıahat jasaý, taý jynystarynyń, mıneraldar men qazbalardyń úlgilerimen tanystyratyn kásibı sheberlik synyptaryna qatysý, sporttyq jáne shyǵarmashylyq alańdarda konkýrstar, vıktorınalar ótkizý, tájirıbeli oqytýshylardyń kásibı psıhologııalyq-pedagogıkalyq basqosýyna belsene aralasý da qarastyrylǵan.
Abaı oblysy bilim basqarmasy baspasóz qyzmetiniń dereginshe, Semeı qalasyndaǵy Elektrotehnıkalyq kolledj bazasynda da «IT-lager» kásiptik baǵdar berý jazǵy lageri bar. Oqýshylardy jumysshy mamandyqtaryna jáne óndiristik úderiske aralastyrýdy kózdegen lagerdiń ereksheligi mol. Munda hakatondar men «StartUP» baıqaýlaryna jáne IT-baǵyttaǵy jarystarǵa qatysý úshin oqýshylardy daıyndaý maqsaty qoıylǵan. Beıindik lagerde balalar robottehnıka men drondardy basqarý negizderin úırenedi. Munda 8 jastan 14 jasqa deıingi 10 bala robottehnıkanyń qyr-syryn meńgerip, robotty jasaý men ony basqarý baǵdarlamasyna deıingi kezeńderdi ıgerýge mashyqtanady. Sonymen birge drondarmen jumys isteý, qurastyrý, baǵdarlamalaý jáne basqarý sııaqty sabaqtardy oqıdy. Praktıkalyq sabaqtarda oqýshylardyń qaýipsizdigi basty nazarda bolǵandyqtan, oqý-jattyǵýlar arnaıy belgilengen jerlerde ótedi.
Oqýshylardyń osyndaı tanymdyq baılyǵyn damytatyn jazǵy demalys lagerleriniń biri Bıznes jáne servıs kolledjinde ornalasqan. 8 jastan 14 jasqa deıingi balalar men jasóspirimderdi qamtıtyn «Profi Camp» lagerinde belsendi demalyspen birge saýyqtyrý jáne erte bastan kásiptik tehnıkalyq bilimge baǵyttaý usynylǵan. Baǵdarlamadaǵy «Jas aspaz», «Tátti ómir», «О́z-ózine stılıst», «Sán jáne dızaın hanshaıymy», «Biz týrıstpiz» dep atalatyn bes negizgi baǵyt balalardyń ıntellektýaldy bilimin nyǵaıtyp, shyǵarmashylyq áleýetin ashýǵa mol múmkindik beredi.
Baǵdarlamasynda kondıterlik, aspazdyq, tiginshilik, dızaın, shashtaraz mamandyqtary jaıynda kásibı sheberlik sabaqtary ótkizilip, jyldam daıyndalatyn taǵamdardy ázirleý, gollıvýdtyq ádispen shash buıralaý sııaqty ádis-tásilder tanystyrylady. Sporttyq jáne shyǵarmashylyq alańdardaǵy kvestter, baıqaýlar, túrli oıyn men vıktorına, kúndelikti saıahattar men tanymdyq joryqtar qamtylǵan «Profi Camp» jazǵy demalys lagerinde úsh maýsym boıy oqýshylarǵa úsh mezgil tamaqpen qamtamasyz etiledi.
«Kásiptik baǵdarlaý lagerlerin uıymdastyrý mektep oqýshylarynyń kásibı daǵdylaryn qalyptastyrýǵa jáne olardy ártúrli saladaǵy bolashaq mamandyqtarǵa daıarlaýǵa baǵyttalǵan. Uıymdastyrylǵan lagerlerdiń baǵdarlamalary balalarǵa praktıkalyq bilim men tájirıbe alýǵa kómektesedi. Bul olardyń kásibı jaǵynan qalyptasýǵa mańyzdy qadam bolady», deıdi Abaı oblysy bilim basqarmasy basshysynyń orynbasary Aıjan Qurmanova.
Kásiptik baǵdarlaý lageri arnaıy oqý oryndarynan bólek, Semeı qalasyndaǵy Shákárim atyndaǵy ýnıversıtette de uıymdastyryldy. Jaratylystaný-matematıkalyq jáne qoǵamdyq-gýmanıtarlyq baǵyttaǵy pánder boıynsha mektep oqýshylaryna arnalǵan «jas akademik-2024» jazǵy oqý-jattyǵý jıynynda mektep oqýshylary atalǵan pánder boıynsha teorııalyq bilimderin tereńdetti. Oqýshylar tájirıbelik daǵdylaryn damytyp, ǵylymı zertteý jumystaryn júrgizýmen birge ártúrli deńgeıdegi olımpıadalarǵa barýǵa qol jetkizdi. Jaratylystaný jáne matematıka baǵytyn tańdaǵan 33 oqýshy ǵylymı joba jazý talaptarymen tanysýdan bólek, oqý ornynyń ǵylymı zertteý ortalyqtarynda zerthanalyq jumystar júrgizdi. Ýnıversıtettiń kıim tigý, jıhaz jasaý sheberhanasyna, argotehnoparkke ekskýrsııa jasady.
Joǵaryda atalǵan kásiptik baǵdarlaý lagerleri oqýshylardyń demalys ýaqyttaryn tıimdi ótkizýge múmkindik berip qana qoımaı, sonymen birge olardyń bolashaq mamandyqtaryn tańdaýyna septigin tıgizeri anyq. «Jas geolog», «IT-lager», «Profi Camp» lagerleri balalar men jasóspirimderdiń ózara til tabysýyna, jańa dostar tabýyna, ıaǵnı balalardy jan-jaqty damytýǵa jol ashatynyn aıtpasa da túsinikti.
Kelesi jyly da balalardyń qyzyǵýshylyǵy men múddelerine saı jumys isteýdi qolǵa alatyn kásiptik baǵdarlaý lagerleriniń jumysy odan ári jandanyp, Abaı oblysy bilim basqarmasynyń bastamasymen jazǵy lagerlerge qatysatyn oqýshylardyń sany odan ári kóbeıedi deıdi uıymdastyrýshylar.
Abaı oblysy