ATYRAÝ. 21 qańtar. Otandyq temir jol salasynyń Atyraýdaǵy bólimshesinde jumys jasaıtyn bir top temirjolshynyń qatysýymen túsirilgen beınebaıan ǵalamtorǵa jarııalanyp, áleýmettik jelilerdi qoldanýshylardyń yqylasyna bólendi. Bul týraly egemen.kz tilshisi habarlady.
Ǵalamtordaǵy beınebaıanda temir jol salasynda ár túrli mamandyq boıynsha jumys jasaıtyn jigitter «One Direction» tobynyń «What Makes You Beautiful» ánin oryndaıdy. Olar osy ándi oryndaýmen shektelmeı, beınebaıan túsirgen. Bir tańdanarlyǵy, beınebaıanǵa túsip, án oryndaǵan temirjolshylar ár túrli mamandyqty meńgeripti. Máselen, Bekjan Jıenbetov dıspetcher, Abzal Ǵabbasov dırektordyń kómekshisi, Azamat Bekqojıev operator bolsa, Artýr Ábdirov mashınıstiń kómekshisi, Qartan Baýyrjan kadr bóliminiń basshysy bolyp jumys jasaıdy. Beınebaıanǵa túsýge D.Nurpeıisova atyndaǵy temir jol beketiniń kezekshisi Azamat Aımaǵambetov pen ınjener Dmıtrıı Jýrılo da tartylypty.
Beınebaıanda oryndalǵan án qulaqqa jaǵymdy estiledi. Temirjolshylar beınebaıan sońynda «QTJ-da kóńilsiz adam jumys isteı almaıdy» degen jazba qaldyrypty. Munyń «Qazaqstan temir joly» komapnııasynyń tartymdylyǵyn arttyrý turǵysynda túsirilgeni baıqalady.
Joldasbek Shópeǵul.
Derek: egemen.kz.
Sýret: gazeta.kz.