Qyrkúıekte Astana qalasynda V Dúnıejúzilik kóshpeliler oıyndary ótedi. Ulttyq oıyn túrleri men tól sporttyq saıysta alyptar da kúsh talastyrady. Elorda tórinde qońyr kúzde túńligi túriletin tolaǵaılar saıysyna joldama oljalaý úshin atan jilik, apaıtós sańlaqtar bilek kúshin synap kórdi.
Elorda tórin dúbirge bóleıtin Dúnıejúzilik kóshpeliler oıyndarynda tolaǵaılar da saıysqa túsip, «Powerfull nomad» sport túri boıynsha kúshin synaıdy. Osynaý aıtýly dodaǵa elimizdiń atynan qosylatyn alyptardy irikteýdiń sońǵy kezeńi Astana qalasynda ótti. Respýblıkalyq týrnırde úsh megapolıs, 17 oblystan iriktelip kelgen alyptar bessaıys túri boıynsha dodaǵa kirdi.
Alyptar saıysynyń aldynda sharanyń qurmetti qonaǵy, birneshe márte rekord jańǵyrtqan Jámálı Dıhanuly salmaǵy 3 tonna tartatyn avtokólikke 7 jigitti (árqaısynyń salmaǵy 100 kg) mingestirip aldy da, taıaq tastam jerge (25 metr) tisimen súıredi. Buǵan deıin de birneshe márte rekord jańartyp, alyp kúsh ıesi ekenin áıgilep kele jatqan jigit aǵasy adam balasynyń múmkindigi sheksiz ekenin jastarǵa úlgi etýdi kózdeıdi.
«Jasym – 53-te. Buǵan deıin 5 tonnalyq kólikke 17 adamdy mingizip súıredim, 20 adam syıatyn avtobýsty qozǵap ta kúshimdi synadym. Meniń maqsatym – maqtangerlik emes, qazaq azamattarynyń qaısarlyǵyn, qara kúshke ıe ekenin kórsetý. Adamnyń múmkindigi sheksiz, tek sony tıimdi paıdalana alsań bolǵany. Pyshaqtyń júzinde turyp 170 kg tartatyn temirdi kóterdim. 2013 jyly 18 pyshaqty tabanymmen taptap, tisimmen adamdy, qolymmen girtasyn bir mezette kótergenim Gınnes rekordtar kitabyna endi. Odan keıin bes márte rekord jańarttym», degen Jámálı Dıhanuly tolaǵaılarǵa sáttilik tilep, batasyn berdi.
Qatysýshylar aldymen salmaǵy 100 kg tartatyn kórtasty 1 mınýt ishinde qashyqtyqqa kóterip júrýden synǵa tústi. 19 qatysýshynyń barlyǵy derlik bul mejeden ótti. Ekinshi saıysta salmaǵy 10 kg tartatyn egeýli naızany qashyqtyqqa laqtyrýdan synǵa tústi. Qas qylǵanda alaburtyp turǵan kún raıy da kúrt buzylyp, jel turyp qatysýshylardyń qaırat-kúshine aıtarlyqtaı kedergisin tıgizdi. Odan keıin 130 kg tartatyn jýan bóreneni ash belinen qapsyra ustap ıyqqa salyp, 1 mınýtta otyryp-turý boıynsha dodaǵa tússe, 200 kg júk tıelgen arbany áýdem jerge súırep te kórdi.
«Tolaǵaı» alyptar saıysyn buǵan deıin de ótkizip kelemiz. Kúzde Astana qalasynda Dúnıejúzilik kóshpeliler oıyndary ótedi. Sol dodada alyp kúsh ıeleriniń de básekesin kópshilik tamashalaıdy. Elorda kúnine oraı uıymdastyrylǵan búgingi dodaǵa elimizdiń ár óńirinen iriktelgen 19 sportshy qatysty. О́ńirlerdegi irikteý naýryz aıynan beri júrgizildi. Keshegi 51 put (816 kg) kirdiń tasyn kótergen Balýan Sholaq, qara kúshi boıyna syımaǵan Qajymuqandaı babalarymyzdyń búgingi urpaǵy da qaıratty ekenin dáleldesek deımiz. Igi is-sharany qoldap, ótkizýge muryndyq bolǵan Astana qalasynyń ákimdigine alǵys aıtamyz, bul saıys jyl saıyn jalǵasyn tabady», dedi týrnırdiń uıymdastyrýshysy Temir Spataev.
Saıys qorytyndysynda Túrkistan oblysynan kelgen Azamat Maqulbekov barlyq qarsylasynan basym túsip, bas báıgege tigilgen 1 mıllıon teńgeni oljalap qana qoımaı, V Dúnıejúzilik kóshpeliler oıyndaryna qatysý joldamasyn ıelendi. 2-oryn Aqtóbe oblysynan qatysqan Janbolat Ibadildaevqa buıyrsa (600 myń teńge), 3-oryn mańǵystaýlyq Erseıit Bralınge (400 myń teńge) berildi.
Astana qalasy ákimdiginiń alańynda ótken alyptar saıysyn tamashalaýshylar aldynda almatylyq Baýyrjan Ábdihaıym salmaǵy 40 kg tartatyn mýlıajdy 4 myń ret kóterip óziniń rekordyn jańartsa, Reseıdiń Túmen qalasynan kelgen Azamat Bektasov 81 kg girtasyn Astana qalasynyń 26 jyldyǵyna oraı 26 márte kóterdi.