Elordada street art janry ókilderi arasynda «Astana Graffiti» festıvaliniń ashylý saltanaty ótti. Is-shara Nursultan Nazarbaev qory jáne Smart team management-pen birlese otyryp uıymdastyryldy.
Street art – qalalyq keskindeme óneriniń bir túri. Alǵashqy qabyrǵa sýretiniń qashan paıda bolǵanyn dóp basyp aıta almaspyz. Alaıda bul óner túriniń tarıhy tym aryda jatqany – aqıqat. Tasqa qashalǵan tańbalar, odan keıin Renessans dáýirindegi dinı freskalar, Amerıka kóshelerindegi jasóspirimder jazbalary – munyń barlyǵy búgingi street art óneriniń arǵy arnalary.
Osy oraıda Prezıdent ortalyǵy dırektorynyń orynbasary Botakóz Qaıypova graffıtı sýretshileriniń jumystary zamanaýı ónerdiń derbes janry, qalalyq mádenıettiń ajyramas bóligi ekenin atap ótti.
Al sýretshi ári músinshi Syrym Músirepov «Astana Graffiti» festıvali street art óneriniń ilgerileýine, onyń qoǵam ishinde qoldaý tabýyna yqpal etetinin jetkizdi.
Is-sharaǵa qatysýshy, graffıtı sýretshi Ýlıana Evdokımovanyń aıtýynsha, bul ónerdiń ilki bastaýy qylmys álemimen baılanysty bolǵan. Biraq qazirgi tańda bul – jastardyń klassıkalyq keskindemeniń shekarasynan shyǵyp, erkin shyǵarmashylyqpen aınalysatyn keńistik.
«Street art – kóshe qabyrǵalarynda beınelengen janyńnyń aınasy ıakı sanańnyń sáýlesi. Bul kópshilikke unaıdy. Halyq sulýlyqty qalaıdy. Sol sebepti ony sáýletti Astanamyzǵa syılaǵym keledi. О́tkizilip jatqan festıvaldyń eń unaǵan jeri munda ónerge talaby bar kez kelgen sýretshi týyndysyn el nazaryna usyna alady. Bul týyndygerge úlken shabyt, aldaǵy jumysyna qýat syılaıdy», deıdi ol.
10 tamyzǵa deıin jalǵasatyn bul festıvalda tanymal sýretshilerdiń sheberlik dáristeri ótip, arnaıy konserttik baǵdarlama usynylatyn bolady.