Májilis depýtaty, «Amanat» fraksııasynyń múshesi Dúısenbaı Turǵanov «Atyraý Sý arnasy» eńbek ujymymen kezdesip, kásiporynnyń jumysymen tanysty.
Qazirgi ýaqytta sý sorǵysy jáne súzý stansalaryn jańǵyrtý boıynsha eki joba iske asyrylyp jatyr, olardyń quny 10 mlrd teńgeni quraıdy. Depýtat aımaqtaǵy káriz jáne tazartý qurylystarynyń durys jumys isteýin qamtamasyz etý qajettigin atap ótti.
Qazirgi ýaqytta Atyraý qalasynda kommýnaldyq jelilerdi jańǵyrtý, 33,2 shaqyrym káriz júıesiniń kúrdeli jóndeý jumysy qarqyndy júrip jatyr. Sondaı-aq Sátbaev dańǵyly boıynsha káriz kollektoryn jóndeý jumystary jalǵasýda. Qalada jáne jaqyn mańdaǵy eldi mekenderde tozyǵy jetken 60,1 shaqyrym káriz qubyryna kúrdeli jóndeý júrgizilip jatyr. Eń aldymen, Qulmanov, Sátpaev, Kansev, О́temisov jáne Momyshuly kóshelerindegi jalpy uzyndyǵy 30,7 shaqyrymdy quraıtyn apatty jeliler jóndeledi.
– Qyrkúıek aıynda Májilis depýtattary respýblıkalyq bıýdjet jobasyn qaraıdy. Sol kezde Atyraý qalasynyń sý qubyrlaryn jóndeýge qajetti kelesi jylǵy qarjylandyrý máselesin sheshýge tyrysamyz. Bul birlesken qarjylandyrý bolady, bir bóligi – oblys bıýdjetinen, ekinshisi – respýblıkalyq bıýdjetten, – dedi Dúısenbaı Turǵanov.
Depýtat sondaı-aq jazǵy ýaqytta qala mańyndaǵy turǵyndar sýarmaly sý úshin paıdalanatyn sýdyń tapshylyǵyna nazar aýdardy. Onyń pikirinshe, aldaǵy 2-3 jylda sýmen qamtamasyz etý máselesi sheshiledi.