Qalalyq jerde kópqabatty turǵyn úılerdiń aýlasyna oıyn alańdary men tas joldan basqa eshteńe ornalastyrmaıtyny belgili. Aǵash egilýi múmkin, bolmasa ol da joq. Degenmen bul qaǵıdanyń taldyqorǵandyq Olga Serebrennıkova joqqa shyǵardy. Ol ózi turatyn kópqabatty úıdiń aýlasyna 60 túrli gúl otyrǵyzyp, shahardyń sánin arttyryp otyr. Shaǵyn ǵana aýlanyń shyraıyn keltirgen turǵynnyń eńbegi kópke úlgi.
Osydan onshaqty jyl buryn «Taldyqorǵan – taza qala» aksııasy qolǵa alynyp, jyl saıyn dástúrli túrde turǵyndar aýlasyn retke keltirip júrdi. Bul úrdis keıinnen ádetke aınaldy. Sodan da bolar oblys ortalyǵy el ishindegi taza shaharlar qatarynan túsken emes. Onyń ústine qala basshysy Ernat Bázil tańnan aralap, kóshelerdiń tazalyǵyna basa mán berip otyr.
«Árbir turǵyn qalany Olga hanym sekildi aıalap, esik aldyna gúl egip, aǵashtardy sýǵaryp tursa, qalanyń kórki odan ári jaınar edi. Biz tazalyqty ózimizden bastamaı, qalany qoqystan qutqara almaımyz. Jyl saıyn turǵyndar sany artyp keledi, úıler de jıi salynyp jatyr. Olardan shyǵatyn qatty qaldyqtar da kóbeıedi. Sondyqtan barynsha árbirimiz qalany aıalaı bilýimiz qajet. Qoqystan arnaıy jáshikterge tastap, aýlanyń sándep otyrǵanymyz abzal», deıdi E.Bázil.
Shynynda Olga hanymǵa qarap, kópqabatty úıdiń de aldyn baqqa aınaldyrýǵa bolady degen oıǵa kelesiz. Sebebi jupar ańqyǵan tańǵajaıyp gúlder kórgen kisiniń kóńilin baýraıdy. Oǵan eshkim sol gúlderge baǵban bolǵany úshin aqy tólemeıdi. Jyl saıyn kóktem bastala balasyndaı qarap, únemi qadaǵalap otyrady. Qys kelgenshe jaınap turady.
Keıipkerimiz gúlderin aýladaǵy balalar julyp almaýy úshin kóz jazbaýǵa tyrysady. Alaqandaı jerge osynshama meıirimin tókken janǵa qala basshylyǵy da dán rıza bolyp otyr. Ár gúlge jan jylýyn, kóńil shýaǵyn qosa quıyp, ózgelerge de osyndaı ıigilikti isti qolǵa alýǵa shaqyrady. On bir jyl ishinde áýesqoı baǵban júzdegen túrli gúl ósirip keledi. Onyń óz týǵan jeri men óz qalasyna degen súıispenshiligi kópke úlgi bolyp otyr. Mundaı ıgi is bos jatqan jer ýchaskesin tıimdi paıdalansaq degen nıetten bastalǵan edi.
«Medısına salasynda jumys istedim, zeınetkerlikke shyqqannan keıin bos ýaqytym kóbeıdi, sosyn gúl ósirýmen aınalysa bastadym. Ártúrli gúl ósiremin. Shyraıgúl, túımedaq, balshatyr, baqytgúl, astra, barqytgúl, qońyraýgúl basqa da kóptegen túri bar. Al bórtegúl kóktemde gúldeıdi. Jalpy, gúldiń 60-tan astam túri bar. Ásirese tas raýshan – óte erekshe gúl. О́z qolymmen gúlzar jasadym. Basqa da gúl ósirýshilermen aralasyp turamyn. Biz bir-birimizben tájirıbe almasamyz, bir-birimizge kóshet, tuqym beremiz. О́z qolymyzben oazıs jasap otyrmyz, sony kútemiz, sýaramyz. Ári ádemi, ári paıdaly. Kórshilerge unaıdy, olar bizge qoldaý kórsetedi, birge qýanady, balalar da gúlge uqypty qaraıdy», deıdi zeınetker baǵban.
Osy rette taǵy bir turǵynnyń ıgi isin aıtpasa bolmas. Ol da aýlasyn kógaldandyrýmen 15 jyldan beri aınalysyp keledi. Tatıana Ibragımova 50 sotyq jerge úlken gúlzar jasap, jemis aǵashtaryn ósirip otyr. Lázzat Asanova kóshesindegi №69 kópqabatty úıdiń aýlasyn gúldi baqqa aınaldyrýǵa onyń qansha ter tókkenin gúlzarǵa qaraǵannan-aq uǵyný qıyn emes. Gúl ósirýshiniń ózi munymen shektelmeıtinin aıtady, týǵan qalasyna degen súıispenshiliktiń erekshe úlgisin kórsetip, gúldiń jańa sorttaryn otyrǵyzýdy jalǵastyrmaqshy. Taldyqorǵan qalasy ákimdiginiń málimetine súıensek, bıyl oblys ortalyǵynda «Úlgili aýla» baıqaýy ótedi. Ondaǵy basty maqsaty – qalanyń keskin-kelbetin jaqsarta túsý, aýlalardyń taza, ári jınaqy bolýyn nasıhattaý. Osy arqyly árbir turǵynnyń shaharǵa degen qurmeti artpaq.
«Aýla aýmaqtarynyń sanıtarlyq jaǵdaıy men kógaldandyrylýyn, abattandyrylýyn qolǵa alý úshin arnaıy is-sharalar júzege asady. Turǵyndardy birlese jumys isteýge shaqyryp, aýlasyn taza ustaýǵa jol ashýymyz qajet. Osyndaı turǵyndardy úlgi ete otyryp, ózgelerdi de osyndaı iske qyzyqtyra alamyz», deıdi qala ákiminiń baspasóz qyzmeti.
Jetisý oblysy