Asalyqtardy otyz jyl boıy tolǵandyrǵan másele oń sheshim tapty. Jambyl aýdanynyń ortalyǵy sanalatyn Asa aýylynyń turǵyndary aspaly kópir qajet ekenin birneshe jyl boıy úzdiksiz aıtyp kelgen edi. Aqyry bılik halyqtyń únine qulaq asty. Jurt jyldar boıy talap etken kópir paıdalanýǵa berildi.
Derekke júginsek, Asa aýylynda 13 myńnan astam halyq turady. Jergilikti jurt otyz jyl boıy alty jolaqty temirjoldy tótesinen basyp ótip júrgen. «Aıta-aıta Altaıdy, Jamal apa qartaıdy» deýge shaq qalǵan buqaranyń tilegi aqyry oryndaldy. Endi asalyqtar temirjoldyń arǵy betine alańsyz qatynaıdy.
Oblys ákimdigi baspasóz qyzmeti keltirgen derekke júginsek, kópir qurylysyn júrgizgender barlyq qaýipsizdik sharasyn nazarǵa alǵan. Munda júrginshiler jolaǵy qarastyrylǵan. Kópirdiń bıiktigi 6 metrdi qurasa, uzyndyǵy 41 metr eken. Bir sózben aıtqanda barlyq jumys standartqa saı atqarylǵan.
О́ńir basshysy Erbol Qarashókeev qomaqty qarajatqa salynǵan kópirdi kútip ustaýdyń mańyzy zor ekenin aıtyp otyr. Sondaı-aq ol qaýipsizdik sharalaryn qatań qadaǵalaý qajet dep esepteıdi. Bul jumysty Jambyl aýdany ákimdigi nazarǵa almaq.
«Balalar qaýipsizdigi nazardan tys qalmaýǵa tıis. Aýyl turǵyndary uzaq jyl boıy kótergen másele oń sheshim taýyp, aspaly kópirdiń qurylysy júrgizildi. Aýdan ortalyǵyn mekendegen jergilikti halyq endi ári-beri alańsyz qatynaıtyn boldy. Osy kópirdi kútip ustaýdyń mańyzy zor», deıdi óńir basshysy.
Jergilikti halyq bul qýanyshty uzaq jyl boıy kútkenin aıtyp otyr. Ýádeniń údesinen shyǵyp, kópirdi mejeli merzimde paıdalanýǵa bergen jergilikti atqarýshy bılikke degen rızashylyqtaryn jetkizgenderdiń qarasy qalyń.
«Osy bir ózekti másele asalyqtardy uzaq jyl boıy tolǵandyrǵany jasyryn emes. Jergilikti jurt aspaly kópirdiń qajettigin aıtýdan jalyqqan joq. Túptiń túbinde bılik bizdiń únimizdi estigenine bek qýanyshtymyz. Mine, endi kópten kútken armanymyz aqıqatqa aınalyp, rııasyz qýanyp otyrǵan jaıymyz bar. Ýádede turyp, kópirdi paıdalanýǵa bergeni úshin basshylarǵa aıtar alǵysymyz sheksiz», deıdi Asa aýylynyń turǵyny, ardager Ábditálip Omarov.
Oblys ákimdiginiń baspasóz qyzmeti keltirgen derekke súıensek, aspaly kópirdiń qurylysyn júrgizgen kezde jergilikti atqarýshy bılik múmkindigi shekteýli azamattar men qarııalardyń talap-tilegin eskeripti. Úlkenderdiń ótinishine sáıkes, kópirdiń eki jaǵyna jedel saty ornalastyrylǵan. Bul jedelsatyny densaýlyǵynda aqaýy bar azamattar paıdalanyp, joldyń arǵy betine óte alady.
Jambyl oblysy,Jambyl aýdany