Astana polıseıleri adam urlaý faktisine qatysty túsinikteme berdi, dep habarlaıdy Egemen.kz.
Polıseıler atalǵan faktige qatysty qylmystyq is qozǵalyp, tergeý amaldary júrgizilip jatqanyn rastady. Qazirgi ýaqytta sýdıaǵa qoqan-loqqy kórsetken azamat izdestirilip jatyr.
«Qalalyq Polısııa departamenti Astana turǵynyn bopsalaý jáne urlaý faktisi boıynsha sotqa deıingi tergeý amaldaryn júrgizip jatyr. Sotqa deıingi tergep-tekserý múddesi úshin ózge málimetter jarııalanbaıdy», dedi vedomstvo ókilderi.
Aıta keteıik, belgisiz bireý Astana qalasynyń azamattyq ister jónindegi mamandandyrylǵan aýdanaralyq sotynyń sýdıasy Aıdos Ordabaevtan iri kólemde aqsha bopsalaǵany týraly aqparat Kozachkov offside Telegram-arnasynda jarııalanǵan edi.
Aqparatqa súıensek, betperde kıip, qolyna qarý ustaǵan belgisiz bireý sýdıa Ordabaevqa jaqyndap kelip, ony kólikke mingizip áketken. Qarýly azamat sýdıaǵa onyń otbasy men balalary týraly biletinin aıtyp, iri kólemde aqsha berýin talap etken. Ordabaev óziniń atynan 300 myń teńge nesıe alyp bergen. Sondaı-aq qylmysker keıbir sot aktisi joıylmasa, ony óltiremin dep qorqytyp, taǵy 12 mıllıon teńge berýin talap etken.