E.Bóketov zertteý ýnıversıtetinde «Ulaǵat» qazaq tilin oqytý jobasy kezekti bir jumysyn támamdady. Túrkııa Respýblıkasynyń Kastamoný ýnıversıtetinen professor, doktor, fılolog-ǵalym, qazirgi Túrik dıalekteri men ádebıeti kafedrasynyń meńgerýshisi Orhan Sóılemez bastaǵan bir top magıstrant, PhD, bakalavrıat shákirtteri Qaraǵandyǵa kelip, qazaq tilin jetildirip ketti.
«Ulaǵat» qazaq tilin oqytý baǵdarlamasy baýyrlas eki el men eki joǵary oqý orny arasyndaǵy baılanysty nyǵaıtý, ortaq bilim berý baǵdarlamasyn júzege asyrý arqyly qazaqtyń tilin, mádenıetin, ádet-ǵurpyn, salt-dástúrin sheteldikterge nasıhattaý maqsatynda uıymdastyrylǵan biregeı joba.
Atajurtqa kelgen túrik baýyrlardy ýnıversıtet qazaqtyń qonaqjaılyǵyn kórsetip, qushaq jaıa qarsy aldy. Shashý shashyp, ulttyq dám usyndy.
– Túrik baýyrlarǵa qazaq tilin úıretý jobasyn júzege asyrýǵa fılolog-ǵalym Orhan Sóılemez myrza men kásipker, ult janashyry Erlan Áshim qoldaý tanytyp otyr. «Ulaǵat» jobasy sheńberinde qonaqtarymyz «Turan el qazaq sport» ulttyq sport jáne saıatshylyq ortalyǵynda bolyp, qazaqtyń ulttyq oıyndaryn tamashalady. Bóketov ýnıversıtetiniń til mamandary Kastamoný ýnıversıtetiniń bilim alýshylaryna qazaq tilin úlken qýanyshpen úıretti. «Ulaǵat» baǵdarlamasy – bilim alýshylardyń qazaq tiline qyzyǵýshylyǵyn arttyrýdy, til úırenýshiniń turmystyq, áleýmettik taqyryptarda sóıleý biliktiligin jetildirip, til úırenýshiniń til saýattylyǵy men sóz baılyǵyn, basqalarmen qarym-qatynasqa erkin túsýin jáne oılaý qabiletteri men dúnıetanymdyq daǵdylaryn keńeıtýdi, sabaq úderisinde alǵan bilimderin tereńdetip, teorııany praktıkada qoldaný daǵdysyn qalyptastyrýdy kózdeıtin biregeı joba. Aldaǵy ýaqytta atalǵan joba jandanyp, jalǵasyn taýyp jatsa, bizdiń de oqytýshylar, PhD doktorant pen magıstranttar túrik tilin úırenip, birlesken ǵylymı eńbekter jazýǵa múmkindik alady, – deıdi ýnıversıtettiń basqarma tóraǵasy-rektory Nurlan Dýlatbekov.
Túriktiń ǵalymy Orhan Sóılemez sóılegen sózinde bir apta boıy tek qazaq tilimen birge qazaq eliniń mádenıetin tanyp bildik dedi.
– Kastamoný ýnıversıteti men E.Bóketov atyndaǵy Qaraǵandy ýnıversıteti arasynda ǵylymı baılanys nyǵaıyp keledi. Jaqynda Kastamoný ýnıversıtetiniń rektory Ahmet Hamdı Topal Qaraǵandyǵa kelgen issaparynda E.Bóketov ýnıversıtetiniń basshylyǵymen júzdesip, akademııalyq utqyrlyq, tájirıbe almasý jónindegi kelisimshartqa qol qoıdy. Kastamoný ýnıversıtetiniń on bes shákirtine E.Bóketov ýnıversıteti fılologııa fakýltetiniń til mamandary qazaq tilin jetik úırete bildi. Biz bir apta aralyǵynda qazaq tilin, qazaq mádenıetin tanyp bildik. Ýnıversıtettiń qonaqjaılyǵyna kóńilimiz de toldy, qazaq tilinen bilimimiz de tolyqty, – dedi topty bastap kelgen ǵalym.
Qazaq tilin úırenýge nıet bildirgen on bes bilim alýshy ulttyq kıim men áshekeı buıymdardyń kórmesin tamashalap, qolónerden sheberlik sabaǵyna da qatysty. Dárishanada qazaq tilinde alǵashqy tanysý sabaǵy ótti. Túrik baýyrlar E.Bóketov zertteý ýnıversıtetiniń Qarqaralydaǵy oqý-dalalyq bazasynda qazaq tili men túrik tili arasyndaǵy uqsastyq pen aıyrmashylyqty túsinip, turmystyq jaǵdaıda qoldanylatyn leksıkany meńgerip, qazaqsha beıresmı qarym-qatynas ornata alatyn dárejege jetti desek artyq aıtpaımyz. Qazaq tilin meńgergen barlyq qatysýshyǵa E.Bóketov ýnıversıteti sertıfıkat tabystady.
Qaraǵandy oblysy