Qaterli isik dertinen zardap shegetin naýqastardyń sany azaıar emes. Aty jaman dertke shaldyǵyp, jyl saıyn qanshama azamat úzilip jatyr. Áıtse de aýyr dertti arqalaǵandarǵa aq halatty abzal jandar qoldan kelgenshe kómek kórsetedi.
Birneshe kún buryn jambyldyq onkolog mamandar jaǵdaıy kúrt nasharlaǵan naýqastyń ómiri úshin kúresti. Sanaly ǵumyrynda balabaqshada úzdiksiz eńbek etip, súıikti jumysyna jipsiz baılanǵan 62 jastaǵy naýqas buryn-sońdy medısınalyq kómekke júginip kórmepti. Densaýlyǵyn ýaqtyly tekserte almaǵandyqtan, boıyndaǵy isik alty kelige deıin ósip ketken.
Naýqastyń aıtýynsha, dárigerlerdiń aldyna barýǵa eshqandaı sebep tappaǵan. Ǵumyr boıy densaýlyǵy syr bermegen. Sondyqtan ol dárigerlerge qaralýdy, kómekke júginýdi jón dep sanamaǵan. Tek boıyn dert dendegennen keıin ǵana lajsyz medısına qyzmetkerlerine qaıyrylýǵa májbúr bolǵan.
Merkilik naýqastyń jaǵdaıymen tanysqannan keıin oblystyq kópbeıindi onkologııa jáne hırýrgııa ortalyǵynda qaterli isikti joıý boıynsha biregeı operasııa jasalǵan. Oblystyq densaýlyq saqtaý basqarmasynyń baspasóz qyzmeti keltirgen derekke júginsek, naýqastyń boıyndaǵy isik qaýipti shekke deıin ósip ketken.
Osy jyldyń kóktem mezgilinde asqazanyn áldebir syrqat mazalaı bastaǵanyn sezgen naýqas dertine daýa izdeý kerektigin túsingen. Asqazan tusy apta saıyn úlkeıe túsken. Jaǵdaıdyń ýshyǵa bastaǵanyn túsinse de, ol bastapqyda aýrýǵa basa mán bermepti. Ýaqyt ótken saıyn aǵzasynyń dert dendegen bóligi aıtarlyqtaı ulǵaıǵanyn baıqaǵan. Saldarynan tynys alýy qıyndap, erkin qadam basýy muńǵa aınalǵan. Aqyr sońynda tumaýǵa qarsy ekpe alý nıetimen emhanaǵa barǵan. Mamandar azamattyń densaýlyǵyn tolyq teksergen kezde baýyr tusynda úlken isiktiń paıda bolǵanyn anyqtapty.
«Egý pýnkttindegi dáriger birden ishime nazar aýdardy. Syrqat belgilerin birden baıqaǵan bolýy kerek, shuǵyl tekserilý keregin aıtty. Eger vaksınalaý bolmaǵanda, men eshqashan dárigerdiń aldyna barmas edim», deıdi naýqas.
Oblystyq kópbeıindi onkologııa jáne hırýrgııa ortalyǵynyń torakoabdomınaldy hırýrgııa bólimshesiniń meńgerýshisi, emdeýshi dáriger Erasyl Arapovtyń aıtýynsha, jaǵdaı aıtarlyqtaı ýshyqqan. Naýqas qaıtýy qıyn úderistiń bastapqy shegine jetken. Neoplazma is júzinde búkil baýyrdyń 70 paıyzyn alyp, ót qabymen jáne jalpy baýyr arterııasymen tyǵyz baılanysta bolǵan, al alyp isiktiń salmaǵy joǵaryda aıtqanymyzdaı, 6 kılogramǵa deıin jetken eken.
«Onkologııalyq ortalyqtyń emhanasyndaǵy áriptesterim osyndaı qıyn naýqas týraly aıtqan kezde qol qýsyryp otyrmaı, birden tekserýge bardym. Kúrdeli ota jasaýǵa birneshe sebep túrtki boldy», deıdi bilikti maman jaǵdaıdy tolyqqandy túsindirip.
E.Arapovtyń aıtýynsha, naýqas kúrdeli operasııa jasaýǵa esh qınalmastan kelisim bergen. Ol óziniń aty jaman aýrýdy jeńip shyǵatynyna 100 paıyz senimdi bolǵan.
«Naýqastyń optımıstik kózqarasy sheshýshi ról atqarǵanyn aıta ketken jón. Ol óziniń dıagnozyn estigende esh sasqan joq. Biz onyń reaksııasyna tańǵaldyq. Naýqas esh oılanbastan: «Jaraıdy, maǵan qajet dúnıeniń bárin isteńizder», dedi. Ol kisiniń osyndaı táýekelge barýy jaǵdaıdy jeńildetti», deıdi dáriger.
Bilikti mamannyń aıtýynsha, mundaı isikti tolyǵymen alyp tastaǵan abzal. Olaı bolmaǵan jaǵdaıda aýyr syrqattyń qaıtalaný qaýpi joǵary bolmaq. Al operasııa kezinde jasalǵan kez kelgen sátsiz qozǵalys qan ketýine sebepshi bolýy yqtımal. Bir sózben aıtqanda, asa saqtyqty qajet etedi. Basqa amal joq.
«Kópbeıindi onkologııa jáne hırýrgııa ortalyǵynyń torakoabdomınaldy onkohırýrgııa mektebiniń kópjyldyq tájirıbesiniń arqasynda osyndaı kúrdeli ári qaýipti otany jasaýǵa múmkindik týyp otyr. Bári sátimen aıaqtalǵany kóńil qýantady», deıdi E.Arapov.
Oblystyq kópbeıindi onkologııa jáne hırýrgııa ortalyǵynyń dırektory, oblystyń bas onkologi Aıbaz Álıhanovtyń aıtýynsha, byltyr emdeý mekemesi zamanaýı jabdyqtarmen tolyqtaı jabdyqtalǵan eken. Endi óńirdegi jáne kórshiles oblystardaǵy onkologııalyq dertke shaldyqqan naýqastardy qoljetimdi sáýlelik terapııa ádisterimen emdeýge tolyqtaı múmkindik bar.
Jambyl oblysy