Oblys ortalyǵyndaǵy Kardıohırýrgııalyq ortalyqqa bul joly Qytaıdyń kardıohırýrg mamandary keldi. Buǵan deıin «Ulttyq medısınalyq holdıng» AQ-tyń oblystaǵy kúnderi sheńberinde óńirge «Ulttyq ǵylymı kardıohırýrgııalyq ortalyq» AQ dırektorlar keńesiniń tóraǵasy Qadyr Omarov, «Ulttyq ǵylymı-kardıohırýrgııalyq ortalyq» AQ basqarmasynyń tóraǵasy, Iýrıı Pıa bastaǵan 30-ǵa jýyq kardıohırýrgter kelip, júrekke kúrdeli otalar jasaǵan edi. Sondaı-aq, bilim berý semınarlaryn ótkizip, sheberlik sabaqtaryn júrgizdi. Oblystyq ákimdik pen Ulttyq medısınalyq holdıng arasynda áriptestik týraly memorandýmǵa qol da qoıyldy. Qazir oblysta kardıologııalyq klasterdi qurý boıynsha baǵdarlama ázirlenýde. Ozyq tehnologııalardyń tilin biletin óz mamandarymyzdy daıarlaý qajettigi týdy. Jergilikti kardıohırýrgter Reseı, Belarýs, Izraıl, Iýgoslavııa elderinde tájirıbelerin shyńdap, biliktilikterin jetildirip kelipti. Olardyń beseýi – «Bolashaq» baǵdarlamasynyń túlekteri. Máskeýdegi A.Bakýlev atyndaǵy júrek-qan tamyry hırýrgııasy ortalyǵynda tájirıbeden ótken Dáýren Jaqypbaev ta bar. Al, holdıng kúnderi aıasynda elimizdiń bas kardıohırýrgi Iýrıı Pıa 12 jastaǵy Anastasııa Kazakovaǵa ota jasaǵan bolatyn. Jalpy, ashylǵaly bergi 2-3 jyldyń ishinde óńirlik kardıohırýrgııalyq ortalyqta 2435 adamnyń júregine ota jasalypty. Barlyq bólimsheleri zerthanalar, dıagnostıkalyq zertteýler sońǵy úlgidegi medısınalyq qural-jabdyqtarmen jaraqtalǵan. Eń bastysy, kardıohırýrgııalyq ortalyq ujymy – jas dárigerler, ıaǵnı olardyń ortasha jasy 28 jasty quraıdy. Oblysqa jumys saparymen kelgende Elbasy jas kardıohırýrg dárigerlermen júzdesken bolatyn. Mamandardyń barlyǵy Lıtva, Izraıl, Reseı, Belarýs jáne elimizdiń jetekshi kardıohırýrgııalyq ortalyqtarynda bilimderin jetildirip qaıtty. Pavlodarǵa kelip, mınskilik professor, Iý.Ostrovskıı, lıtvalyq professorlar sheberlik synyptaryn ótkizdi. Sheberlik-sabaqtar sheńberinde 92 adamǵa júrekke, sonyń ishinde 25 balaǵa ota jasaldy. Bári sátimen boldy. Medısınalyq orta býyn ókilderi de Izraıldiń Rehovot qalasyndaǵy «Kaplan» aýrýhanasy janyndaǵy medbıkeler mektebinde bolyp, tájirıbe almasty. Iаǵnı, ınnovasııa aýrýhanalarǵa keldi. Endi mine, sheberlik synyptary qaıta jalǵasty. Qytaılyq bilikti mamandar sheberlik synyptaryn ótkizdi. Kardıohırýrgııalyq ortalyq dırektorynyń mindetin atqarýshy Oraz Muqashevtyń aıtýynsha, jergilikti kardıohırýrgter professor Sao Hýa jáne Fýdjoý qalasy medısına ýnıversıtetiniń professory Djang Gýı Sannyń qatysýymen bolǵan júrekke jasalǵan otalar barysynda sheberlik synyptaryna qatysypty. Bizdiń óńirge kelgen qytaılyq mamandar týa bitken jáne kishkentaılarynan júrek aqaýlary bar 1 jastan 11 jasqa deıingi balalarǵa ota jasady.
Farıda Byqaı,
«Egemen Qazaqstan».
PAVLODAR.