Ulttyq banktiń Aqsha-kredıt saıasaty komıteti bazalyq mólsherlemeni jyldyq 14,25%-ǵa deıin, 25 bazıstik tarmaqqa tómendetý týraly sheshim qabyldady. Álemdegi azyq-túlik baǵasynyń ósýi men Reseıde ınflıasııanyń jedeldeýine baılanysty syrtqy ınflıasııalyq jaǵdaı qolaısyzdaý bolyp otyr dep málimdeıdi Ulttyq bank (UB).
Ulttyq bank kelip túsetin derekterdi, sonyń ishinde baǵa ósýiniń turaqty bóligin jáne jalpy ınflıasııanyń targetke jaqyndaý traektorııasyn baqylaıdy. Baǵa ósýiniń báseńdeý úrdisin bekitý úshin jáne ınflıasııa boıynsha 5%-dyq maqsatqa qol jetkizý úshin aqsha-kredıt sharttary uzaq ýaqyt boıy ustamdy qatań qalpynda saqtalady», delingen UB habarlamasynda.
Jyldyq ınflıasııa 2024 jylǵy maýsym aıynda 8,4%-ǵa deıin tómendedi jáne UB boljamy sheginde olardyń ortalyq máninen tómen qalyptasty. Baǵa ósýiniń baıaýlaýyna azyq-túlik taýarlarynyń tómen ınflıasııasy, sondaı-aq tarıftik reformany iske asyrý qarqynynyń báseńdeýi negizgi úlesti qosty. Osyǵan qaramastan, jyldyq ınflıasııa quramynda «Tarıfti ınvestısııaǵa aıyrbastaý» baǵdarlamasy jáne naryqtyq qyzmetterdiń qymbattaýy aıasynda aqyly qyzmetterdiń baǵasy barynsha ósip keledi.
UB dereginshe, halyqtyń ınflıasııalyq kútýleri qubylmaly: olar sáýirdegi joǵary mánderinen tómendedi, alaıda teńge baǵamynyń azdap álsireýine baılanysty maýsym aıynda birshama ósti. Bazalyq mólsherleme boıynsha kezekti josparly sheshim 2024 jylǵy 29 tamyzda jarııalanady.