KО́KShETAÝ. 26 sáýir. Aqmola oblysynyń saılaýshylary óz tańdaýyn jasaýda belsendilik tanytýda. Bıyl alǵash ret daýys berip otyrǵan Shoqan Ýálıhanov atyndaǵy Kókshetaý memlekettik ýnıversıtetiniń 1-kýrs stýdenti Ámirhan Táshenov bul kúnniń ózi úshin erekshe este qalatynyn aıtty. Bul týraly egemen.kz habarlady.
«Búgin men úshin erekshe qýanyshty kún. Bıyl tuńǵysh ret saılaýǵa qatysyp, ózimniń №16 ýchaskemde daýys berdim. Elimniń azamaty retinde úlken jaýapkershilik arqalaǵanyma erekshe qýandym. Sebebi, ómirimdegi aıtýly oqıǵa – Qazaqstan Respýblıkasynyń Prezıdentin saılaýǵa qatystym», – deıdi Ámirhan.
Sondaı-aq, ol saılaý ýchaskesine kelgen kezde kóńili tolqyǵanyn da aıtty. «Ýchaskege tolǵanyspen aıaq bastym. Áıtse de, komıssııa tóraǵasy men hatshysy tuńǵysh ret daýys berýshi retinde maǵan jylyshyraı tanytty. Tipti estelik syılyq tartý etti. Bul bizdiń qoǵamnyń óziniń jas múshesine qurmeti men senimin aıǵaqtaıdy. Mundaı iltıpat meniń jigerimdi tasytty. Abaı atamyz ósıettegendeı, elimniń bir kirpishi bolyp qalanýym, onyń bolashaǵyna adal qyzmet etip, Otanymnyń órkendeýi jolynda aıanbaı eńbek etýim qajettigin túsindim», – deıdi azat eldiń aıbyndy ulany.
Baqbergen Amalbek.
Derek, sýret: egemen.kz.